बुरखा चालेल पण मंगळसुत्र नाही! कर्नाटकात काँग्रेसचे तुष्टीकरणाचे राजकारण जोरात

06-Nov-2023

Total Views | 75

बंगरुळू : कर्नाटकातील कलबुर्गी येथे रविवारी एका सरकारी नोकरीसाठीच्या परीक्षेदरम्यान हिंदू विद्यार्थिनींचे मंगळसूत्र आणि कानातले काढून घेतल्याची घटना समोर आली आहे. दरम्यान, बुरखा घातलेल्या मुलींना तपासणी करून आत प्रवेश दिला जात असल्याचा आरोप विद्यार्थिनींनी केला आहे.

कलबुर्गी येथील प्री-ग्रॅज्युएशन गर्ल्स कॉलेजमधील ही घटना असल्याचे सांगण्यात येत आहे. रविवार ५ नोव्हेंबर रोजी कर्नाटक लोकसेवा आयोगातर्फे एफडीए भरती परीक्षा आयोजित करण्यात आली होती. दरम्यान, यावेळी तपासणीच्या नावाखाली विद्यार्थिनींचे मंगळसूत्र आणि गळ्यातील चेन काढून घेण्यात आल्याचा आरोप विद्यार्थिनींनी केला आहे.

यातील एका विद्यार्थिनीने आरोप केला की, बुरखा घालून आलेल्या मुलींची तपासणी करुन त्यांना बुरख्यातच आत जाण्याची परवानगी देण्यात आली. हिंदू परंपरेत मंगळसूत्र काढणे हे अशुभ आहे. परंतू, अधिकाऱ्यांच्या दबावामुळे असे करावे लागल्याचेही या विद्यार्थिनींनी म्हटले आहे.

दुसरीकडे, याआधी काही विद्यार्थ्यांना ब्लूटूथ आणि इतर कॉपी करणाऱ्या साहित्यासह पकडल्यानंतर ही सतर्कता बाळगण्यात येत असल्याचे अधिकाऱ्यांनी म्हटले आहे. मात्र, तपासाच्या नावाखाली दुसऱ्याच्या चुकीची शिक्षा आम्हाला का दिली जात आहे, असा जाब विद्यार्थिनींनी विचारला आहे.

काही वेळातच ही बातमी व्हायरल झाली. भारतीय जनता पक्षाचे विजयपुरा येथील आमदार बसनगौड़ा यांनी विचारले की, हा नियम फक्त हिंदूंसाठी आहे का? याप्रकरणाचा वाढता विरोध बघता अनेक अधिकारी महाविद्यालयात पोहोचले. तसेच तपासणीच्या नावाखाली महिलांचे मंगळसूत्र काढू नये, अशा सूचना त्यांनी अधिकाऱ्यांना दिल्या.