पश्चिम घाटातुन दोन नव्या पालीच्या प्रजातींचा शोध

मुंबई (विशेष प्रतिनिधी): पश्चिम घाटातील तमिळनाडू राज्यातुन पालीच्या दोन नव्या प्रजातींचा शोध लावण्यात आला आहे. 'निमास्पिस ट्रायड्रा' आणि 'निमास्पिस सुंदरा' अशी या पालीच्या प्रजातींची नावं ठेवण्यात आली आहेत. न्यूझिलंडच्या झूटॅक्सा या प्रसिद्ध आंतरराष्ट्रीय नियतकालिकामध्ये शुक्रवार दि. १७ नोव्हेंबर रोजी या संबंधीचा शोधप्रबंध प्रसिद्ध करण्यात आला आहे.

जैवविविधतेने समृद्ध असलेल्या पश्चिम घाटातुन रंगीबेरंगी पालीच्या दोन नव्या प्रजातींचा शोध साताऱ्याचे अमित सय्यद यांनी लावला आहे. वन्यजीव संशोधक अमित सय्यद यांनी पालींची नावं त्यांच्या शरीरावर असलेल्या रचनेवरुन ठेवली आहेत. 'निमस्पिस ट्रायड्रा' या पालीमध्ये शरीरावर असणाऱ्या पिवळ्या, पांढऱ्या आणि काळ्या अशा तीन रंगांमुळे ट्रायड्रा असे नाव देण्यात आले आहे. तर, शरीरावर असणाऱ्या काळ्या, पिवळ्या, तपकिरी आणि पांढऱ्या रंगाच्या सुंदर नक्षीमुळे 'निमस्पिस सुंदरा' असे नाव देण्यात आले आहे.

या कुळातील पालींवर गेल्या दहा वर्षापांसुन अभ्यास करणाऱ्या अमित यांना २०१८ मध्ये पहिल्यांदा पालीच दर्शन झालं होतं. ही वेगळी पाल असल्याचे लक्षात आल्यानंतर संशोधनांती नवीन संशोधन त्यांच्या हाती लागले आहे. या संशोधनामध्ये अमित सय्यद हे प्रमुख संशोधक असून त्यांच्यासमवेत सॅमसन कुरुंबकरण, राहुल खोत, शिवा हर्षन, ओमकार अधिकारी, आयान सय्यद, मासूम सय्यद, अहमद फैजल, अहमद जेरिथ, शुभंकर देशपांडे, जयदत्त पूरकायस्था आणि शवरी सुलाखे हे सहभागी होते.