म्हाडा कार्यालयात शिवसैनिकांचा ठिय्या !

 

 

मुंबई : शिवसेना ठाकरे गटाचे नेते अनिल परब आणि भाजप नेते किरीट सोमय्या यांच्यातील संघर्ष पेटल्याचे दिसत आहे. अनिल परब यांचे मुंबईतील अनधिकृत कार्यालय तोडण्यात आले आहे. अनिल परब यांचे ज्या सोसायटीत घरं होतं त्या सोसायटीत अनिल परब आमदार झाल्यानंतर सोसायटीच्या मालकी जागेत जनसंपर्क कार्यालय करावे अशी इच्छा येथील रहिवाशांनी केली होती.

 

"कित्येक वर्षापासून मी जागा वापरत होतो. माझे कार्यालय अनधिकृत आहे असे भासवून कार्यालय तोडण्याची मागणी केली होती. त्या अनुषंगाने मला म्हाडा नोटिस दिली होती. त्याला मी उत्तर दिले होते त्यावरून म्हाडाने नोटिस मागे घेतली. किरीट सोमय्या कोण आहे? अधिकारी आहे का? घरं पाडली गेली तर त्याला जबाबदार किरीट सोमय्या राहील."असं अनिल परब यांनी पत्रकार परिषद घेऊन सांगितलं होतं.

 

याशिवाय आम्ही सगळे किरीट सोमय्याचे स्वागत करायला तयार आहोत म्हणत किरीट सोमय्या यांना अनिल परब यांनी खुलं आव्हान दिलं होतं. त्यावरून संतप्त झालेल्या शिवसैनिकांनी थेट म्हाडाचे कार्यालयात गाठत ठिय्या आंदोलन सुरू केले आहे. वांद्रे पूर्व भागातील परब यांच्या ऑफिसवर ही कारवाई करण्यात आली. म्हाडाने कारवाई केल्यानंतर शिवसैनिक आक्रमक झाले आहेत. शिवसैनिकांनी वांद्रे इथल्या म्हाडा ऑफिसच्या समोर मोठ्या प्रमाणावर गर्दी केली असून किरीट सोमय्या यांच्याविरोधात जोदार घोषणाबाजी करण्यात येत आहे. काही शिवसैनिकांनी म्हाडा ऑफिसमध्ये घुसण्याचाही प्रयत्न केला.

 

याच दरम्यान किरीट सोमय्या हे अनिल परब यांचं अनधिकृत कार्यालय तोडलं होतं, तिथे पाहण्यासाठी जाणार होते. मात्र पोलीसांनी त्यांना वांद्र्याच्या दिशेने जातांना रोखलं होतं. म्हाडाच्या कार्यालयात शिवसैनिकांनी किरीट सोमय्या यांच्या विरोधात घोषणाबाजी करत आंदोलन सुरू केले आहे. म्हाडाचे अधिकारी उत्तर देणार नाही तोपर्यंत इथून जाणार नाही अशी भूमिका आंदोलकांनी घेतली आहे. म्हाडाचे 56 वसाहती आहेत. तेथील नागरिकांनी थोडी-थोडी जागा वाढवली असल्याचे सांगत पाडकाम केलं जाऊ शकतं त्यामुळे नागरिकांच्या मनात भीती निर्माण झाली आहे. त्यामुळे म्हाडाच्या अधिकाऱ्यांना जाब विचारायला मोठ्या प्रमाणात शिवसैनिक जमा झाले होते.