वेदांता-फॉक्सकॉनकडे कुणी पैसे मागितले का? चौकशी करा : राज ठाकरे

नागपूर : महाराष्ट्र मोठा होण्याचं कारणच मुळात उद्योग महाराष्ट्रामध्ये आले हेच होतं. ज्यावेळेला उद्योगांसाठी आपण रेड कार्पेट टाकलं, त्यावेळाला महाराष्ट्राची प्रगती झाली. सर्व जेवढे उद्योग भारतामध्ये येऊ इच्छितात त्यांची पहिली पसंती हा महाराष्ट्र असतो. जर एखादा उद्योग महाराष्ट्रात येण्याच्या तयारीत होता तर नेमकं फिस्कटलं कुठे याची चौकशी व्हावी, वेदांता-फॉक्सकॉनकडे कुणी पैसे मागितले का? याची चौकशी करा , अशी मागणी मनसे अध्यक्ष राज ठाकरे यांनी केली आहे. नागपूरमध्ये झालेल्या पत्रकार परिषदेत ते बोलत होते.

"ज्या प्रकारची औद्योगिक गोष्टींकडे महाराष्ट्राने लक्ष द्यायला पाहिजे. मुळात वेदांताचं फिसकटलं कुठे आणि कशामुळे ह्याची चौकशी होणं गरजेचं आहे सगळ्या उद्योगाकडे काही पैसे मागितले गेले का?, असा सवालही त्यांनी विचारला. देशातलं प्रत्येक राज्य मोठं व्हावं प्रत्येक राज्यामध्ये उद्योगधंदे यावेत तुम्हाला जर आठवत असेल तर मी २०१४च्या निवडणूकीला माझ्या भाषणामध्ये सांगत होतो की नरेंद्र मोदी उद्या पंतप्रधान झाल्यावरती त्यांनी उत्तर प्रदेश, बिहार आणि झारखंड या तीन राज्यांवरती जास्तीत जास्त लक्ष द्यावं. की या राज्यांमधनं बाहेर पडणारी लोकं ही त्याच राज्यामध्ये काम शोधतील. त्यामुळे प्रत्येक राज्यामध्ये उद्योगधंदे यायला पाहिजेतच. पण महाराष्ट्रामध्ये आलेला उद्योग बाहेर का जातोय? याची चौकशी होणं गरजेचं आहे.", असेही राज ठाकरे म्हणाले.

राज ठाकरेंनी नागपूर मनसेची कार्यकारणी बरखास्त करत असल्याचेही जाहीर केले. गेल्या १६ वर्षांत पक्षीय स्तरावर ज्या प्रमाणे बदल आणि वाढ अपेक्षित होती. ते दिसलेले नाहीत. त्यामुळे आता भविष्यात नव्या तरुण चेहऱ्यांना संधी देणार असल्याची माहितीही राज ठाकरेंनी दिली.