पक्षप्रवेशाच्या नावाखाली आदित्य ठाकरेंकडून बनवाबनवी !

 

 

 

मुंबई : मुख्यमंत्री एकनाथ शिंदे यांनी केलेल्या उठावानंतर शिवसेनेतील ठाकरे गटाला मोठ्या प्रमाणात गळती लागली असून आमदार खासदारांच्या पाठोपाठ आता पदाधिकाऱ्यांनी देखील ठाकरेंना रामराम ठोकायला सुरुवात केली आहे. भाजप आणि शिंदे गटाकडून दिल्या जाणाऱ्या शहाला काटशह देण्याचा प्रयत्न ठाकरेंकडून केला जात आहे. त्याचाच एक भाग म्हणून वरळीतील काही पदाधिकाऱ्यांनी शिवसेनेत प्रवेश केल्याच्या पोस्ट्स समाज माध्यमांवर झळकत असून ते पदाधिकारी भाजपचे असल्याचा दावा केला जात आहे. मात्र, आदित्य ठाकरेंकडून केले जाणारा दावा म्हणजे निव्वळ बनवाबनवी असल्याचा आरोप वरळी भाजपच्या नेत्यांनी केला आहे.

 

 

'आदित्य ठाकरेंकडून पक्षप्रवेशाच्या बाबतीत केल्या जाणाऱ्या पोस्ट केवळ दिशाभूल करणाऱ्या आहेत. ज्या व्यक्तींची नावे घेऊन त्यांना भाजपचे पदाधिकारी दाखविण्याचा प्रयत्न केला जात आहे, ते पदाधिकारी म्हणजे सध्याचे शिवसैनिकच असून केवळ केवळ संभ्रम निर्माण करण्यासाठी हे प्रकार केले जात आहेत. प्रवेश करणाऱ्या व्यक्तींचा भाजपशी काडीमात्र संबंध नसून हा प्रकार म्हणजे शिवसैनिकांनीच शिवसेनेत प्रवेश करण्यासारखा आहे,' असे प्रत्युत्तर वरळी भाजप युवा मोर्चाचे अध्यक्ष मदन गुप्ता यांनी दिले आहे.