अखेर ताडोबातील 'या' गावाचे पुनर्वसन पूर्ण

 

 

 

 

 

 

मुंबई(प्रतिनिधी): ताडोबा व्याघ्र प्रकल्पातील कोअर क्षेत्रात असलेल्या कोळसा या गावाची पुनर्वसन प्रक्रिया दि. २८ जून रोजी पूर्ण झाली आहे. या गावातील सगळ्या गावकऱ्यांचे मूळ तेह्सीलमधील गोलाभूज गावात करण्यात आले आहे. यामुळे ताडोबामध्ये १२५ हेक्टरपेक्षा जास्त अधिवासाची भर पडली असून गावकऱ्यांना नवीन जीवनाची संधी उपलब्ध झाली आहे.

 

 

ताडोबा अंधारी व्याघ्र प्रकल्पाच्या दाट जंगल परिसरात वसलेले कोळसा गाव २०१७ पासून पुनर्वसनाच्या प्रतीक्षेत होते. या प्रकल्पातील सहा गावांच्या पुनर्वसनाची प्रक्रिया सुरू होऊन १५ वर्षे उलटून गेली आहेत. पण कोळसा आणि रांतलोधी ही गावे सोडायला तयार नव्हती. यातील रतालोधी या गावाचे या वर्षी दिवाळी पर्यंत पुनर्वसन करण्यात येणार आहे.

 

 

कोळसा गाव अत्यंत दुर्गम भागात वसल्याने शिक्षण, आरोग्य, पाणी, वीज, रस्ते, वाहतुकीची साधने, रोजगार अशा अनेक सुविधांपासून वंचित होते. त्यामुळे गावाला अनेक प्रकारच्या समस्यांना सामोरे जावे लागत होते. तसेच वन्य प्राणी पिकांचेही नुकसान करत होते. वाघ, बिबट्या, अस्वल अशा भक्षक प्राण्यांची भीती नेहमीच असायची. परंतु, बराच वेळ लोटल्यावर कोळसा गावचे लोक शेवटी दुसऱ्या गावी जाण्यास तयार झाले. आणि त्याचे पुनर्वसन करण्यात आले आहे. क्षेत्र संचालक जितेंद्र रामगावकर व बाह्य क्षेत्र उपसंचालक जी. गुरुप्रसाद यांच्या प्रयत्नांचे फलित आहे.

८० कुटुंबांना घरबांधणीसाठी ३७० चौरस मीटर आणि भूमिहीन कुटुंबांना १८६ चौरस मीटर जमीन देण्यात आली आहे. तसेच नवीन पुनर्वसनाच्या ठिकाणी प्रति कुटुंब २ हेक्टर जमीन शेतीसाठी देण्यात आली आहे. लाभार्थ्यांना ७५ हजार रुपये प्रोत्साहनपर रक्कम आणि घरबांधणीसाठी तीन लाख रुपये शासनाकडून देण्यात आले आहेत.