गृह राज्यमंत्री असूनही आमच्या मतदार संघाला फंड मिळत नाही: शंभूराजे देसाई

 

 

पणन विभागाचा कामकाज वाटपाचा आदेश आज पर्यंत निघालेला नाही. नरवीर तानाजी मालुसरे यांच्या उमरड येथील समाधी स्थळ परिसराचा विकास करण्याची घोषणा मुख्यमंत्री उद्धवजी ठाकरे यांनी तेथील कार्यक्रमात केली होती. अर्थ व वित्त राज्य मंत्री नात्याने याची शंभूराज देसाई यांनी विधानपरिषदेत घोषणा केली. यासाठी ५ कोटी रुपये निधी तरतूद करण्याची शिफारस अर्थ राज्यमंत्री या नात्याने शंभूराज देसाई यांनी उपमुख्यमंत्री - अर्थमंत्री अजित पवार यांच्याकडे केली. मात्र वारंवार पाठपुरावा करून देखील नरवीर तानाजी मालुसरे यांच्या समाधी स्थळ विकासासाठी ५ कोटी रुपये मंजूर करण्यात आले नाहीत.

 

 

दोन वेळा हा विषय मुख्यमंत्र्यांसमोर सांगितला, परंतु काहीच घडले नाही. वित्त नियोजन राज्यमंत्री असून देखील मतदारसंघाच्या कामांसाठी अर्थ संकल्पात तरतुदी करण्यासाठी उपमुख्यमंत्री - अर्थमंत्री अजित पवार यांच्याकडे सातत्याने विनवणी करावी लागायची. "जेव्हा युतीचे सरकार होते, तेव्हा मी आमदार होतो, देवेंद्र फडणवीस मुख्यमंत्री असताना एकनाथ शिंदे मंत्रिमंडळात होते. यादरम्यान जेवढा निधी आणू शकत होतो, तेवढा सुद्धा निधी राज्यमंत्री म्हणून आणू शकलो नाही." असे ते म्हणाले. वित्त नियोजन राज्यमंत्र्याची ही वस्था असेल तर बाकीच्या आमदारांनी काय बोलावे? असा सवाल शंभूराज देसाई यांनी उपस्थित केला. या वस्तुस्थिती बाबत मुख्यमंत्र्यांना अनेक वेळा सांगितले. परंतु काहीच घडले नाही. आम्ही शिवसेना सोडलेली नाही, गटनेता हा बहुमताने निवडला जातो. आमचे गटनेते एकनाथ शिंदे आहेत. आम्ही स्वर्गीय बाळासाहेब ठाकरे यांचा ज्वलंत हिंदुत्वाचा विचार पुढे नेणार आहोत असे शंभूराज देसाई म्हणाले.