पालघर साधू हत्याकांड : सीसीटीव्हीत कैद झालेल्या 'त्या' आठ जणांचा जामीन फेटाळला

या प्रकरणात राजू गुरूड, विजय पीलेना, रिशा पीलेना, दीपक गुरूड, सीताराम राठोड, विजय गुरूड, रत्ना भवर, ईश्वर निकोळे, फिरोज साठे, मोहन गावित आदींना जामीन मंजूर करण्यात आला आहे. तर राजल गुरूड, महेश गुरूड, लहान्या वाळेकर, संदेश गुरूड, हवासा साठे, भाऊ साठे, रामदास राव आणि राजेश राव यांचा जामीन अर्ज फेटाळण्यात आला. राजेश आणि रामदास राव यांच्या हत्येच्या कटात सहभागी असल्याचे पुरावे सीसीटीव्हीत कैद झाले असून त्याची फॉरेन्सिक तपासणी करण्यात आली आहे. तसेच साक्षीदारांनीही दोघांची ओळख पटवली आहे.

"मृत साधूंवर दगडफेक केल्याच्या घटनेतून दोघांची भूमिका स्पष्ट होते की, राजेश राव याने मृत कल्पवृक्ष गिरी महाराजांवर काठ्यांनी हल्ला केल्याची नोंद पंचनाम्यात आहे. आरोपांच्या गांभीर्याचा विचार करत हा जामीन अर्ज नाकारण्यात येत आहे.", असेही न्यायालयाने म्हटले. दरम्यान, जामीन मंजूर झालेल्या सर्वांना २५ हजारांच्या जातमुचल्यावर सोडण्यात आले आहे. परंतू, या प्रकरणाचा सर्व सुनावण्यांना त्यांची उपस्थिती बंधनकारक आहे, अशी अटही ठेवण्यात आली आहे.