नाशिक- उपचाराअंती 'रिंग' केलेल्या गिधाडाची भरारी; अंजनेरीत गिधाडाचे पुनर्वसन

डिसेंबर, २०२१ मध्ये निफाडमध्ये 'युरेशियन ग्रिफाॅन' जातीचे गिधाड अशक्त अवस्थेत सापडले होते. हे गिधाड कमकुवत, निर्जलित आणि बंबल फुट आजाराने ग्रासलेले असल्याने 'इको-इको फाऊंडेशन'च्या स्वयंसवेकांनी त्याला ताब्यात घेतले. त्याला नाशिकमध्ये हलवल्यानंतर 'बीएनएचएस'चे डाॅ. विभू प्रकाश माथुर यांच्या मार्गदर्शनाअंतर्गत त्याच्यावर उपचार करण्यात आले. उपचारानंतर गिधाडाला पुन्हा नैसर्गिक अधिवासात मुक्त करण्याआधी त्याच्या पायाला रिंग लावण्याचा निर्णय घेण्यात आला. ज्यामुळे त्याच्या स्थलांतर मार्ग जाणून घेता येऊ शकेल. यासाठी नाशिकमध्ये गिधाड सुरक्षित क्षेत्र स्थापन करण्यावर वनविभागासोबत कार्यरत असलेली 'नेचर कॉन्झर्व्हेशन सोसायटी' यांनी 'बीएनएचएस'कडून पिवळया रंगाच्या रिंग मिळवल्या.

डॉ. विभु प्रकाश माथुरांकडून ऑनलाईन प्रशिक्षण घेवुन 'नेचर कॉन्झर्व्हेशन सोसायटी'ने गेल्या आठवड्यात या गिधाडाच्या उजव्या पायात रिंग बसवल्या. या रिंग वरील सांकेतिक क्रमांक X 01 असा आहे. तीस दिवसांच्या उपचारानंतर आंतरराष्ट्रीय प्रोटोकॉलचे पालन करुन रिंग लावण्यात आलेले गिधाड मंगळवारी अंजनेरी, वनक्षेत्र नाशिक (प्रादेशिक) येथे सोडण्यात आले. ही कामगिरी उपवनसंरक्षक तुषार चव्हाण यांच्या मार्गदर्शनाखाली सहाय्यक वनसंरक्षक, मनमाड डॉ. सुजित नेवसे, वनपरिक्षेत्र अधिकारी, येवला (प्रा.) अक्षय म्हेत्रे, वनपरिक्षेत्र अधिकारी, फिरतेपथक वणी बशीर शेख, मानद वन्यजीव रक्षक व इको-इको फाउंडेशनचे अभिजित महाले व त्यांचे सहकारी तसेच नेचर कॉन्झर्व्हेशन सोसायटी, नाशिकच्या प्रतिक्षा कोठुळे व त्यांचे सहकारी यांच्या सहकार्याने यशस्वी करण्यात आली.