नोएडातील धर्मांतरण प्रकरणाचे धागेदोरे नाशिकपर्यंत

नाशिक : उत्तर प्रदेशातील नोएडा येथील धर्मांतरण प्रकरणाचे धागेदोरे नाशिकपर्यंत असल्याची धक्कादायक बाब समोर आली आहे. उत्तर प्रदेश दहशतवाद विरोधी पथकाने (एटीएस) नाशिक रोडच्या आनंद नगरमधील एका युवकाला याप्रकरणी अटक केली आहे. त्यामुळे नाशिक पोलीसही सतर्क झाले आहेत.

 

 

नाशिक रोड परिसरातील आनंद नगर या भागात एक युवक राहत होता. स्वतःला तो कुणाल चौधरी असल्याचे सांगत होता. मात्र, त्याचे खरे नाव आतिफ असल्याचे पुढे आले आहे. याच युवकाला उत्तर प्रदेश दहशतवादविरोधी पथकाने अटक केली आहे. जून महिन्यात नोएडामध्ये घडलेल्या धर्मांतर प्रकरणात आतिफचा समावेश असल्याचा संशय आहे. या आधारेच त्याला अटक करण्यात आली आहे.पोलीस सूत्रांनी दिलेल्या माहितीनुसार, आतिफ उर्फ कुणाल याच्या बँक खात्यामध्ये परदेशातील विविध खात्यांमधून पैसे जमा झाल्याची बाब समोर आली आहे. विशेष म्हणजे, ही एकूण रक्कम तब्बल २० कोटी रुपये असल्याचे तपासात उघड झाले आहे. संशयित आतिफसह इतर दोन जणांना वेगवेगळ्या ठिकाणांहून अटक करण्यात आली आहे. मूकबधिर व्यक्तींचे बळजबरी धर्मांतर करून घेणे आणि देशविरोधी कारवाया करण्यास त्यांना प्रवृत्त करणे, हा त्यांचा प्रामुख्याने उद्देश असल्याचे यापूर्वीच पुढे आले आहे.नोएडामध्ये घडलेल्या घटनेचे ‘कनेक्शन’ नाशिकमध्ये आल्याने याबाबतच्या प्रकरणाचे धागेदोरे आणखी कुठपर्यंत जातील, हे बघणेदेखील महत्त्वाचे ठरणार आहे. त्यामुळे नाशिक पोलीसही सतर्क झाले आहेत. उत्तर प्रदेश ‘एटीएस’ने एकूण तीन जणांना ताब्यात घेतले आहे. त्यात एक जण नाशिकचा, तर मुजफ्फरनगर (उत्तर प्रदेश) तेथील मोहम्मद शरीफ कुरैशी, मोहम्मद इदरीस यांचा समावेश आहे. आतिफच्या अटकेबाबत नाशिक पोलीस अनभिज्ञ असून उत्तर प्रदेशात ही कारवाई झालेली असल्याने स्थानिक यंत्रणा सतर्क झाली आहे. याप्रकरणी पुढे काय खुलासा होतो, तापासात काय निष्पन्न होते, याकडे सगळ्यांचे लक्ष लागले आहे.

 

नाशिकच्या युवकाच्या खात्यात २० कोटीउत्तर प्रदेशात गाजत असलेल्या धर्मांतरणाच्या प्रकरणात तेथील दहशतवाद प्रतिबंधक विभागाने (एटीएस) रविवारी लखनऊमध्ये तीन जणांना अटक केली. त्यापैकी एक जण नाशिकचा आहे. धर्मांतरणासाठी नाशिकच्या युवकाच्या खात्यात विविध देशांतून २० कोटी रुपये जमा झाले आहेत. या युवकाच्या खात्यात जमा झालेले रक्कम समजल्यावर अनेकांचे डोळे विस्फारले. ‘एटीएस’च्या पथकाने अटक केलेल्या तिघांमध्ये नाशिकचा कुणाल अशोक चौधरी उर्फ आतिफ, मुजफ्फरनगर (उत्तर प्रदेश) येथील मोहम्मद शरीफ कुरैशी व मोहम्मद इदरीस यांचा समावेश आहे. उत्तर प्रदेश ‘एटीएस’ने या तिघांकडून कुवैतसह अन्य काही देशांतून धर्मांतरणासाठी २० कोटी रुपये जमविल्याचा, तसेच उत्तर प्रदेशात जूनमध्ये उघड झालेल्या बेकायदेशीर धर्मांतराचे देशव्यापी रॅकेट आणि धर्मांतर करण्यासाठी परदेशातून निधी संकलनाच्या रॅकेटमध्ये सहभागाचा आरोप आहे. या प्रकरणात ‘एटीएस’ने जूनमध्ये मौलाना उमर गौतमला, तसेच मेरठ येथून नुकतेच मौलाना कलीम सिद्दीकीला अटक केली होती. सलीमने सिद्दिकीला १७ वर्षे धार्मिक धर्मांतर करण्यात मदत केली. त्याचप्रमाणे इद्रिस आणि चौधरी यांनीदेखील सिद्दिकीला मदत केली. अटक केलेले तिघे मौलाना कलीम सिद्दिकीचे साथीदार असून, सिद्दिकी दि. ५ ऑक्टोबरपर्यंत न्यायालयीन कोठडीत आहे. दरम्यान, ‘एटीएस’ने आतापर्यंत देशाच्या विविध भागांतून १० ते १२ जणांना अटक केली आहे. वेगवेगळ्या नावाने चालवले जाणाऱ्या विश्वस्त संस्था (ट्रस्ट)मध्ये धर्मांतरासाठी परदेशी निधी वापरला जात होता, असे उत्तर प्रदेश ‘एटीएस’च्या तपासात पुढे येत आहे.

 

असे आहे ‘नाशिक कनेक्शन’आतिफ उर्फ कुणाल नावाच्या व्यक्तीला नाशिक रोडच्या आनंदनगर भागातून अटक करण्यात आली आहे. तो शहरात कुणाल नावाने राहायचा. विदेशातून वेगवेगळ्या खात्यांमधून २० कोटी रुपये आतिफ उर्फ कुणालच्या खात्यात कुठून आले, याचा तपशील शोधण्यात येत असून, त्याची चौकशी सुरू असल्याचे बोलले जात आहे.