टोकियो ऑलिम्पिक २०२१ : पी. व्ही. सिंधूची उपांत्य फेरीत धडक

 

 

टोकियो : सध्या टोकियो इथे चालू असलेल्या ऑलिम्पिक २०२१मध्ये भारताच्या पदकाच्या आशा पुन्हा पल्लवित झाल्या आहेत. भारताची अव्वल महिला बॅडमिंटपटू पी. व्ही. सिंधू सलग दुसऱ्यांदा ऑलिम्पिकमध्ये उपांत्य फेरीत पोहोचली. तिने टोकियो ऑलिम्पिकमध्ये महिला एकेरीची उपांत्य फेरी गाठली. पी. व्ही. सिंधूने उपांत्यपूर्व फेरीच्या सामन्यात जपानच्या यामागुची हिचा पराभव केला. तिने यामागुचीवर २१-१३, २२-२० असा रोमहर्षक विजय मिळवत उपांत्य फेरी गाठली.

 

 

 

पहिल्या सेटमध्ये पी. व्ही. सिंधूने जोरदार खेळ केला. ती पहिल्या सेटमध्ये ८-६ने आघाडीवर होती. ही बढत तिने ११-८ ने वाढवली. सिंधूचा या सेटमध्ये अखेरपर्यंत बोलबाला राहिला. तिने हा सेट २३ मिनिटात २१-१३ असा जिंकला. दुसऱ्या सेटमध्ये सिंधूने ११-६ अशी बढत घेतली. तिची आघाडी कायम होती. परंतु यामागुचीने देखील जोरदार खेळ करत सिंधूला कडवी झुंज दिली. तिने सामना १६-१६ अशा बरोबरीत आणला. त्यानंतर दोघांनी जोरदार खेळ केला तेव्हा सामना २०-२० ने बरोबरीत होता. तेव्हा सिंधूने सलग दोन पाँईंट घेत सेटसह सामना जिंकला.सिंधू महिला एकेरीत पदकाची प्रबळ दावेदार आहे. तिने उपांत्य फेरी गाठत आपली दावेदारी आणखी मजबूत केली आहे.दरम्यान, वेटलिफ्टर मीराबाई चानूने टोकियो ऑलिम्पिकमध्ये भारताला रौप्य पदक जिंकून दिले. तर बॉक्सिंगमध्ये लवलिना बोर्गोहेन हिने उपांत्य फेरी गाठत पदक निश्चित केले आहे.