संजय राऊतांवर छळाचे आरोप करणाऱ्या महिलेला तडकाफडकी अटक

मुंबई (सोमेश कोलगे): शिवसेना खासदार संजय राऊत यांच्यावर छळवणूकीचे आरोप करणाऱ्या डॉक्टर महिलेला मंगळवारी बांद्रा पोलिसांनी दुपारी ताब्यात घेतले. संबंधित डॉक्टर महिलेने संजय राऊत यांची तक्रार करणारे पत्र नरेंद्र मोदींनाही लिहिले होते. तसेच संजय राऊत यांच्यावर गुन्हा दाखल करा, अशी मागणीही त्या वारंवार करीत होत्या.

शिवसेना खासदार व सामानाचे कार्यकारी संपादक संजय राऊत यांनी आपल्यावर अत्याचार केले, असा आरोप पीडित महिलेने केला होता. त्यांनी याबाबत पंतप्रधान नरेंद्र मोदी यांना एक पत्र लिहून ते आपल्या ट्विटरवर प्रसिद्ध केले होते. पीडित महिला या बाळासाहेब ठाकरेंवर आधारित बाळकडू चित्रपटाच्या निर्मितीतही सहभागी होत्या. पीडित महिलेने संजय राऊत यांच्यावर गुन्हा दाखल करण्याची मागणी पोलिसांकडे सातत्याने केली आहे.

आपल्यावर आरोप करणारे पीडित महिलेचे ट्विट डिलीट करावेत यासाठी संजय राऊत यांनी कोर्टात धाव घेतली होती. तसेच पीडित महिलेनेदेखील न्यायालयात दाद मागितली होती. परंतु मंगळवारी अचानक बांद्रा पोलिसांनी पीडित महिलेलाच ताब्यात घेतले आहे. पीडित महिलेने शैक्षणिक कागदपत्रात अफरातफर केल्याची निनावी तक्रार आपल्याकडे असून त्यावर ही कारवाई झाल्याचे कारण पोलिसांनी दिले आहे. मात्र पीडित महिलेला ताब्यात घेण्यासाठी आलेल्या पोलिसांकडे कोणतेही दस्तावेज नव्हते, असे पीडितेच्या वकिलांचे म्हणणे आहे. तसेच संजय राऊत यांच्यावरील आरोप मागे घेण्यासाठी हे दबावतंत्र असल्याचेही वकिलांनी म्हटले आहे.

पोलिसांनी या महिलेला मंगळवारी दुपारी अटक केली. मात्र वकिलांकडून मिळालेल्या माहितीनुसार त्यांना दुसऱ्या दिवशी बुधवारी न्यायालयासमोर हजर केले जाणार आहे. त्यामुळे पीडित महिलेला रात्र पोलिसांच्या ताब्यातच काढावी लागेल.