उत्कृष्ट व्यवस्थापनकर्ता उद्योजक

बाजारात आपल्या उत्पादनाची मागणी वाढविण्यासाठी करावे लागणारे प्रयत्न हे एकमेक आव्हान कुठल्याही उद्योजकासमोर नसते. कारखान्याचे चक्र सुस्थितीत आणि सुरळीत राखण्यासाठी उत्तम व्यवस्थापन कौशल्याची प्रचिती देणे, हेदेखील उद्योजकासाठी तितकेच आवश्यक असते आणि त्याशिवाय कुठल्याही उद्योजकाला गत्यंतर नाहीच. अडचणी आणि जागतिक संकटाच्या काळात तर हे आव्हान अधिक भीषण स्वरुप प्राप्त करते. कोरोना काळात नाशिक येथील सातपूर औद्योगिक वसाहतीत असलेल्या ‘सॅनिओ इलेक्ट्रोफॅब प्रा. लि.’ या सारंग रवींद्र अत्तरदे यांच्या कंपनीलाही याच आव्हानांचा मोठा सामना करावा लागला. मात्र, कर्मचारीवर्गाचे उत्कृष्ट व्यवस्थापन करत अत्तरदे यांनी या संकटावर यशस्वीपणे मात केली. त्यामुळे त्यांना ‘उत्कृष्ट व्यवस्थापनकर्ता उद्योजक’ असे म्हटले तर वावगे ठरणार नाही.कोरोना काळ हा सर्वांसाठीच अडचणींचा आणि आव्हानात्मक होता. या सामाजिक, आर्थिक संकटांची झळ ही औद्योगिक क्षेत्रालादेखील मोठ्या प्रमाणावर बसली. याकाळात म्हणूनच उद्योजकांची सजगता आणि व्यवस्थापन कौशल्य पणाला लागले होते.

‘लॉकडाऊन’मुळे सर्वत्र बंदची स्थिती असल्याने कंपनीत काम करणारा कामगार उपलब्ध होण्यास मोठी अडचण अत्तरदे यांना भेडसावत होती. तसेच, उत्पादनाच्या वितरण प्रणालीचेदेखील आव्हान अत्तरदे यांच्या समोर उभे ठाकले होते. त्याचप्रमाणे कोरोनाचा संसर्ग होऊ नये, यासाठी काळजी घेताना शासकीय नियमांचे पालन आपल्या कंपनीत प्रत्येकाने करावे व तसेच ते घडावे, याचेही एक आव्हान अत्तरदे यांच्या समोर होते. त्याचप्रमाणे उद्योग-व्यवसाय निरंतर सुरू राहावा यासाठी आर्थिक घडी बसविणे, त्यातच मागणी कमी असणे, त्यामुळे आर्थिक शिस्त मोडू न देणे, अशाही विविध आव्हानांचा सामनादेखील त्यांना या काळात करावा लागला. कामगार वर्गाची उपलब्धता हे इतर आव्हानांपेक्षा एक मोठे आव्हान होते. कारण, इतर आव्हाने ही वस्तुनिष्ठ स्वरूपाची होती. परंतु, कामगारांची अनुपलब्धता हे जसे प्रासंगिक होते, तसेच ते व्यक्तिनिष्ठ आव्हानदेखील होते. कारण, प्रत्येक कामगार आणि त्याचे कुटुंब हे कोरोनापासून स्वत:चा बचाव करण्यास प्राधान्य देत होते आणि ते स्वाभाविकदेखील होते. त्यामुळे कामावर हजर होण्याबाबतचा निर्णय सर्वस्वी त्या व्यक्तीच्या आणि त्याच्या कुटुंबीयांच्या मतावर अवलंबून होता. त्यामुळे कामगारवर्गाशी बोलून अत्तरदे यांनी त्यांचे कामानुसार वर्गीकरण केले. तसेच, उपलब्ध कामगार व काम यांचे गणित आखत अत्तरदे यांनी आपल्या कारखान्याची कार्यप्रणाली निश्चित केली. तसेच, कामगार उपलब्धतेचा प्रश्न सोडविण्यासाठी त्यांनी नाशिक व इतर जवळपासच्या नागरिकांशी संपर्क साधत, त्यांना काम उपलब्ध करून दिले. त्याचप्रमाणे जे कंत्राटी कामगार, त्या काळात कंपनीच्या कंत्राटी सेवेत होते, त्यांना कमी न करता त्यांनादेखील कंपनीच्या कामात समाविष्ट ठेवले.