पेट्रोल आणि डिझेलवरील व्हॅट राज्यसरकारतर्फे त्वरित कमी करण्यात यावा

पुणे : नुकतीच केंद्र सरकारने पेट्रोल आणि डिझेलवरील उत्पादन शुल्कात कपात केली. केंद्र सरकारने पेट्रोलच्या उत्पादन शुल्कात ५ रुपयांनी तर डिझेलच्या उत्पादन शुल्कात १० रुपयांनी कपात केली आहे. केंद्र सरकारने पेट्रोल आणि डिझेल ह्या अत्यावश्यक इंधनांच्या उत्पादन शुल्कात कपात केल्यापाठोपाठ देशातील अकरा राज्यांनी मूल्यवर्धित करकपात करुन नागरिकांना दिलासा दिला आहे.

पण पेट्रोल आणि डिझेल वरील करात कोणत्याही प्रकारची सवलत राज्यातील सत्ताधारी महाविकास आघाडीने दिली नाहीये. पेट्रोल आणि डिझेल ह्या अत्यावश्यक इंधनावरील मूल्यवर्धित कर कमी करण्याकडे राज्य सरकारचे लक्ष वेधण्यासाठी पुणे शहर भाजप तर्फे महात्मा फुले मंडई परिसरात आंदोलन करण्यात आले. पुणे शहर भाजप अध्यक्ष जगदीश मुळीक यांच्या नेतृत्वाखाली हे आंदोलन झाले. या वेळीज जगदीश मुळीक यांनी, ''केवळ हप्ता वसुली करण्यासाठी जनमताचा विश्वासघात करून राज्यात सत्तेत आलेल्या महाविकास आघाडीला सर्वसामान्य जनतेच्या प्रश्नांमध्ये स्वारस्य नसल्याची'' टीका केली.

''राज्य सरकारने पेट्रोल व डिझेलवरचा मूल्यवर्धित करामध्ये (व्हॅट) कपात करावी, एसटी कामगारांच्या न्याय मागण्या मान्य कराव्यात आणि आरोग्य विभागातील भरती परीक्षांमधील अनागोंदी कारभारावर नियंत्रण आणावे'' अशीही मागणी या वेळेज पुणे भाजप तर्फे करण्यात आली. ह्या अभिनव आंदोलनात प्रतिकात्मक राक्षसाच्या डोळ्यांना पट्टी बांधण्यात आली होती ;झोपेचे सोंग घेतलेल्या वसुली सरकारने जनतेचे प्रश्न सोडविण्यासाठी पुढाकार घ्यावा असे आवाहनही यावेळी करण्यात आले.

''आपले अपयश लपविण्यासाठी महाविकास आघाडी सरकार सातत्याने केंद्राकडे बोट दाखवून टीका करीत असते. केंद्र सरकारने इंधनाचे भाव कमी केल्यानंतर राज्यातील आघाडीचा खरा चेहरा नागरिकांपुढे उघडा पडला आहे. इंधनावरील व्हॅट कमी केल्यास सर्वच वस्तूंच्या किमती कमी होणार आहेत . त्यामुळे राज्यातील नागरिकांना मोठा दिलासा मिळू शकेल. परंतु हप्ता वसुली, बदल्यांमधील भ्रष्टाचार, गुन्हेगारी प्रवृत्तींना पाठीशी घालणे, जनतेमध्ये दहशत निर्माण करणे हे राज्य सरकारचे प्राधान्यक्रम आहेत.

सरकारच्या नाकर्तेपणामुळे महाराष्ट्रात इंधनावरील जिझिया कर सहन करावा लागत आहे अशीही टीका पुणे शहर भाजप अध्यक्ष जगदीश मुळीक यांनी केली. या आंदोलनाच्या ठिकाणी जगदीश मुळीक यांच्यासह पुणे भाजप सरचिटणीस गणेश घोष, राजेश येनपुरे, दत्ता खाडे, दीपक पोटे,संदीप लोणकर, उपाध्यक्षा स्वरदा बापट, महिला अध्यक्षा अर्चना पाटील, प्रमोद कोंढरे, रवींद्र साळेगावकर, धनंजय जाधव,पुनीत जोशी,योगेश पिंगळे, भाजप शहर पदाधिकारी, भाजप नगरसेवक तसेच पुणे शहर भाजपचे कार्यकर्ते मोठ्या प्रमाणात उपस्थित होते.