ईशनिंदेच्या नावाखाली मानवतेची हत्या

दरम्यान, ताहिर अहमद नसीमची हत्या केल्यानंतर मारेकर्‍याचा एक व्हिडिओ सोशल मीडियावर वेगाने व्हायरल करण्यात आला. सदर व्हिडिओमध्ये न्यायालयातील एका बेंचवर मारेकरी बसलेला दिसत असून पैगंबर मोहम्मदाने आपल्याला स्वप्नात येऊन नसीमची हत्या करण्याचा आदेश दिल्याचे म्हणताना ऐकता येते. पाकिस्तानमध्ये धार्मिक उन्माद कोणत्या थराला पोहोचला आहे, याचे जीवंत उदाहरण या हत्याकांडानंतर पाहायला मिळाले. मारेकर्‍याच्या समर्थनार्थ पेशावरमध्ये एक रॅली आयोजित करण्यात आली होती आणि यात हजारोंच्या संख्येने मुस्लिमांनी भाग घेतला. रॅलीमध्ये निदर्शकांनी नसीमची हत्या केल्याबद्दल मारेकर्‍याचे कौतुक केले आणि त्याला तुरुंगातून तत्काळ सोडून देण्याची मागणी केली. तसेच सरकार ईशनिंदा प्रकरणांच्या लवकरात सुनावणी व निकालात सुस्ती दाखवते आणि यामुळे ताहिर अहमद नसीमची हत्या पाकिस्तानी नागरिकांनी योग्य ठरवली. दरम्यान, दोन वर्षांपूर्वी ईशनिंदेच्या आरोपाखाली अटक होण्याआधी नसीम अमेरिकेत राहणारा अमेरिकन नागरिक असल्याची माहिती नंतर समोर आली. तो पाकिस्तानातील अल्पसंख्याक अहमदिया पंथाशी संबंधित होता आणि त्याच्या हत्येनंतर अमेरिकेने पाकिस्तानला देशातील कठोर ईशनिंदा कायदा संपवण्याचे आवाहन केले आहे. उल्लेखनीय म्हणजे, अहमदिया पंथाला १९७४ साली पाकिस्तानी संविधानातील दुसर्‍या दुरुस्तीने इस्लाममधून बाहेर काढण्यात आले आणि तेव्हापासून आतापर्यंत अहमदिया पंथियांना सातत्याने उत्पीडनाचा सामना करावा लागला.

 

 

सलमान तासीर यांच्याप्रमाणेच पाकिस्तानातील अल्पसंख्याक आणि ख्रिश्चन नेते शाहबाज भट्टी यांचीही २०११ साली ईशनिंदेशी निगडित प्रकरणांत न्यायाची मागणी केल्यानंतर हत्या करण्यात आली होती. अधिकार संघटनेने असा दावा केला की, ईशनिंदा कायद्याचा वापर वैयक्तिक सूड घेण्यासाठी आणि राजकीय कारणांनी केल्या जाणार्‍या हिंसाचाराला योग्य ठरवण्यासाठी केला जातो. फारच कमी प्रकरणांत पुराव्यांच्या आधारावर आरोपी आपले निर्दोषत्व सिद्ध करण्यासाठी संघर्ष करु शकतो. हिंसक जमाव, पोलीस, साक्षीदार, अभियोजन पक्ष, वकील आणि न्यायाधीशांना घाबरवून, धमकावून प्रकरण धसास लावण्याच्या प्रयत्नात असतो. दरम्यान, ईशनिंदेच्या गुन्ह्यातील आरोपींना मृत्युदंड द्यायला हवा, यावर पाकिस्तानी लोकसंख्येच्या मोठ्या भागाचे एकमत आहे. परंतु, अशा लोकांनी धार्मिक साहित्य आणि आधुनिक कायद्यांचे कसलेही ज्ञान नाही.

 

उल्लेखनीय म्हणजे, २०१८ साली पाकिस्तानच्या सर्वोच्च न्यायालयाने देशातील सर्वाधिक ‘हाय प्रोफाईल’ ईशनिंदा प्रकरणी एक ऐतिहासिक निर्णय दिला. त्यानुसार या प्रकरणातील आरोपी ख्रिश्चन महिला आसिया बीबी हिला नऊ वर्षे तुरुंगात काढल्यानंतर कनिष्ठ न्यायालयाने दिलेल्या मृत्युदंडाच्या शिक्षेतून मुक्त करण्यात आले. तथापि, यामुळे देशभरात सर्वत्र पसरलेले कट्टरपंथी इस्लामी गट नाराज झाले आणि ईशनिंदेच्या आरोपींविरोधात हिंसेचा वापर केला पाहिजे, असे सांगणार्‍या धर्मांध मौलवी खादिम हुसैन रिझवीच्या ‘तहरिक-ए-लब्बेक पाकिस्तान पार्टी’च्या पुढाकाराने मोठ्या प्रमाणावर निदर्शने करण्यात आली. सध्या आपण एकविसाव्या शतकात आल्याचे म्हणतो, पण ते केवळ म्हणण्यापुरतेच असते. कारण, इथले अनेकजण मध्ययुगीन बर्बरता आणि जाहिलपणापासून अजूनही दूर गेलेले नाहीत. हेच त्यांचे वास्तविक रुप असून सभ्यतेचे आवरण केवळ एक दिखावा आहे.