'क्वारंटाईन' विषयावर दर्जेदार लघुपट 'कुलूपबंद'!

मुंबई : सध्या जमाना डिजिटलचा आहे. अधिकाधिक प्रेक्षकवर्ग वेबसीरिज पाहण्यातच आता दंग असतो. अगदी कमी कालावधीत उत्तम कंटेन्ट, फुल टू मनोरंजन प्रेक्षकांना अनुभवायला मिळतं. लघुपटाचे देखील अगदी तसेच आहे. लघुपटही अगदी कमी वेळात प्रेक्षकांना खूप काही सांगून जातात. आपल्या आजुबाजूला घडणाऱ्या घटना अगदी साध्या-सोप्या भाषेत मांडण्याची ताकद लघुपटात असते. हे लघुपट मनोरंजन तर करतातच त्याचबरोबर काही तरी सामाजिक संदेशही देऊन जातात. थोड्याशा कालावधीत बरेच काही सांगून जातात हे लघुपट. त्यांच्या विषय आणि आशयामध्ये एवढी ताकद नक्कीच असते. सध्या लॉकडाऊनच्या काळात प्रेक्षक जुन्या मालिका, चित्रपट तसेच वेबसीरिज पाहण्यात दंग आहेत. शिवाय उत्तमोत्तम लघुपटही प्रेक्षक पाहत आहेत. अशातच लॉकडाऊनच्या या काळात आणखी एक "कुलूपबंद" नावाचा दर्जेदार लघुपट युट्युबवर प्रदर्शित झाला आहे.

आशिष निनगुरकर या नवोदित दिग्दर्शकाने या लघुपटाचे दिग्दर्शन केले आहे. आशिषने याआधी काही लघुपट व माहितीपटांचे दिग्दर्शन केले आहे. तसेच काही चित्रपट,लघुपट व माहितीपटांचे लेखनही त्याने केले आहे.त्याने लॉकडाऊनच्या काळात याआधी दिग्दर्शित केलेल्या 'नियम' या लघुपटाने बऱ्याच चित्रपट महोत्सवांमध्ये बाजी मारली आहे. 'कोरोना' व्हायरसच्या परिस्थितीत आशिषने घरात राहून 'कुलूपबंद' हा सामाजिक संदेश देणारा लघुपट तयार केला आहे. 'वर्क फ्रॉम होम'च्या धर्तीवर घरच्या घरीच हा लघुपट चित्रीत झाला आहे. स्वतःचा 'मोबाईल' हा 'कॅमेरा', घरातील 'कुटूंब' हेच 'कलाकार' आणि स्वतःचे राहते 'घर' हेच 'लोकेशन' वापरून आशिषने 'कुलूपबंद' हा लघुपट निर्मिती केला आहे. आशिष सोडला तर या क्षेत्रात बाकी घरातील सर्व नवखे आहेत. आशिषने शॉर्टफिल्मची संकल्पना घरात ऐकवली आणि अवघ्या एक दिवसात 'कुलूपबंद' नावाचा सामाजिक संदेश देणारा हा लघुपट चित्रीत झाला.बाहेरच्या जिल्ह्यातून घरी आल्यावर 'क्वारंटाईन' म्हणून 'नियम' पाळणे बंधनकारक आहे. कोरोनाची साखळी तोडण्यासाठी 'सोशल डिस्टन्स' ठेवून सगळ्यांनी सहकार्य करण्याची गरज आहे. 'सुरक्षित अंतर पाळा,कोरोना संसर्ग टाळा' हा अनमोल संदेश या लघुपटातून देण्यात आला आहे.

'कुलूपबंद' या लघुपटाची निर्मिती 'काव्या ड्रीम मुव्हीज' अंतर्गत किरण निनगुरकर यांनी केली असून या लघुपटात आशिषचे भाऊ अनुराग निनगुरकर व स्वरूप कासार यांनी भूमिका साकारल्या आहेत. या लघुपटासाठी लेखन,छायाचित्रण,निर्मिती व्यवस्थापन व दिग्दर्शन अशी चौफेर भूमिका आशिषने निभावली आहे. संकलन व संगीत अभिषेक लगस यांचे असून संजय कासार व रुपाली कासार यांचे या लघुपटासाठी विशेष सहकार्य लाभले आहे. 'क्वारंनटाईन' या अत्यंत महत्वाच्या विषयावर सामाजिक संदेश देणारा हा लघुपट नुकताच युट्युब वर प्रदर्शित झाला असून त्याला उत्तम प्रतिसाद मिळत आहे.