कोकणातून चतुराच्या नव्या प्रजातीचा उलगडा

 

 

मुंबई (अक्षय मांडवकर) - कोकण पट्ट्यामधून चतुराच्या नव्या प्रजातीचा शोध लावण्यात मुंबईतील दोन तरुण संशोधकांना यश मिळाले आहे. या नव्या प्रजातीचे नामकरण कोकणाच्या नावे म्हणजे 'कोकण राॅकड्वेलर' असे करण्यात आले आहे. या चतुराचा वावर महाराष्ट्राच्या पश्चिम किनारपट्टीच्या क्षेत्रात सर्वसामान्यपणे पाहावयास मिळतो. 

 

 

 

बालपणी चतूराच्या शेपटीला दोरा बांधून आपण सगळ्यांनीच त्याच्याबरोबर खेळण्याचा आनंद लुटला आहे. या चतूरांमध्ये एका नव्या प्रजातीची भर पडली आहे. गोड्या पाण्यातील अधिवासात चतुर हे पर्यावरणीयदृष्ट्या महत्त्वाचे कीटक आहेत. पश्चिम घाटात साधारण १०६ प्रजातीचे चतुर आणि टाचणीच्या प्रजाती आढळतात. त्यामधील ४० टक्के प्रजाती या केवळ पश्चिम घाटात आढळतात म्हणजेच त्या पश्चिम घाटाच्या प्रदेशनिष्ठ प्रजाती आहेत. नव्याने उलगडलेल्या 'कोकण राॅकड्वेलर' या प्रजातीचा समावेश 'ब्रॅडिनोपाया' या वर्गात होतो. या पोटजातीत जगात तीनच प्रजाती आढळतात. मात्र, आता या नव्या शोधामुळे ती संख्या चार झाली आहे. स्वतंत्र्य संशोधक म्हणून काम करणारे मुंबईतील शंतनु जोशी आणि डाॅ. दत्तप्रसाद सावंत यांनी नव्या चतुर प्रजातीचा उलगडा केला आहे. सोमवारी प्रसिद्ध झालेल्या 'झूटॅक्सा' या संशोधन पत्रिकेत या संशोधनाचे वृत्त प्रकाशित करण्यात आले आहे.