वाहनतळांलगत अनधिकृत पार्किंग केल्यास दहा हजार रुपये दंड

महत्त्वाच्या रस्त्यांना जोडणा-या रस्त्यांवर अनधिकृत पार्किंग केल्यासही होणार दंड

मुंबई : बृहन्मुंबई महापालिका क्षेत्रातील रस्त्यांवर व रस्त्यांलगत अनधिकृत 'नो पार्किंग झोन'मध्ये वाहन 'पार्क' केल्याचे आढळल्यास १० हजार रुपये दंड करण्यात येणार आहे. दंड न भरल्यास संबंधित वाहन 'टोइंग मशीन'द्वारे उचलून नेले जाणार आहे. दि. ७ जुलै २०१९ पासून याची अंमलबजावणी करण्यात येणार असल्याची माहिती महापालिका आयुक्त प्रवीण परदेशी यांनी दिली. शहरात अनेक ठिकाणी अनधिकृत पार्किंग होत असून यामुळे वाहतूकीला अडथळा निर्माण होत असल्यामुळे हा निर्णय घेतला असल्याचेही त्यांनी सांगितले.

नागरिकांना आपली वाहने 'पार्क' करणे सुलभ व्हावे, यासाठी महापालिकेद्वारे विविध १४६ ठिकाणी तब्बल ३४ हजार ८०८ वाहने पार्क करण्याची सुविधा उपलब्ध आहे. अनेक ठिकाणी वाहनतळांचा वापर न करता लगतच्या रस्त्यांवर अनधिकृत पार्किंग केले जाते. हे लक्षात घेऊन वाहनांच्या पार्किंगला शिस्त यावी आणि वाहतूक सुरळीत रहावी, याकरिता वाहनतळांलगतच्या एक किलोमीटरच्या रस्ता; तसेच दोन महत्त्वाच्या रस्त्यांना जोडणारे छोटे रस्ते हे 'नो पार्किंग झोन' म्हणून जाहीर करण्याचे आदेश परदेशी यांनी सर्व परिमंडळीय उपायुक्तांना दिले आहेत. याबाबत जनजागृती होण्यासाठी सूचना देणारे फलक लावण्याचेही निर्देश देण्यात आले आहेत.

माहितीच्या महापुरात रोजच्या रोज नेमका मजकूर मिळविण्यासाठी लाईक करा... facebook.com/MahaMTB/ आणि फॉलो करा twitter.com/MTarunBharat