मुंबईकरांनो घ्या आनंद 'फ्लेमिंगो सफारी'चा !

एरोलीतून ठाणे खाडीच्या जलसफरीचा अनुभव ; जैवविविधतेचेही दर्शन

मुंबई (अक्षय मांडवकर) - मुंबई, ठाण्यात अद्याप थंडीची चाहूल लागली नसली तरी या शहरांतील खाडी परिसरावर मात्र गुलाबी पंखांची चादर पसरली आहे. दरवर्षी न चुकता मुंबई-ठाण्याच्या खाडीत मुक्कामाला येणारे रोहित अर्थात फ्लेमिंगो पक्षी दाखल झाले असून पर्यटकांना या पक्ष्यांना अगदी जवळून न्याहाळता येणार आहे. वन विभागाच्या 'मॅंग्रोव्ह सेल'च्या वतीने या आठवड्यापासून ऐरोली येथून ठाणे खाडीची बोटसफर आणि फ्लमिंगो दर्शन सफारी सुरू करण्यात आली आहे.

 

खारफुटी आणि सागरी परिसंस्थेच्या जैवविविधतेविषयी माहिती देणारे ‘किनारा आणि सागरी जैवविविधता केंद्र’ 'मॅंग्रोव्ह सेल'ने ऐरोली खाडीलगत उभारले आहे. या केंद्रात माहिती देणारी दोन मोठी दालने असून खेकडय़ांची शेती, कांदळवन सफर, खाडी निरीक्षण, फ्लेमिंगो दर्शन फेरी असे उपक्रम या ठिकाणी राबविण्यात येतात. या माध्यमातून वन विभागाच्या खात्यात उत्पन्न जमा होते. दरवर्षी १,६९० हेक्टरवर पसरलेल्या फ्लेमिंगो अभयारण्याचा दर्जा लाभलेल्या ठाण्याच्या खाडीत गुजरातच्या कच्छच्या रणातून फ्लेमिंगो पक्ष्यांचे आगमन होते. साधारण ऑक्टोबर ते नोव्हेंबर महिन्यांत हे पक्षी मोठय़ा संख्येने दाखल होतात. या पक्ष्यांचे दर्शन घडविण्याच्या हेतूने 'मॅंग्रोव्ह सेल' गेल्या तीन वर्षांपासून ठाणे खाडीत फ्लेमिंगो सफारीचे आयोजन करत आहे.

पक्षिनिरीक्षक आणि सामान्य पर्यटकांना फ्लेमिंगो पक्ष्यांचे दर्शन करता यावे याकरिता 'मॅंग्रोव्ह सेल' गेल्या दोन वर्षांपासून ऐरोलीच्या केंद्रातून फ्लेमिंगो सफारीचे आयोजन करत आहे. थंडीची चाहूल लागली नसली तरी खाडीत अंदाजे तीन हजार फ्लेमिंगो पक्ष्यांचे आगमन झाल्याने आम्ही १५ नोव्हेंबरपासून फ्लेमिंगो सफारीला सुरुवात केल्याची माहिती 'ठाणे खाडी फ्लेमिंगो अभयारण्या'चे वनपरिक्षेत्र अधिकारी एन.जी.कोकरे यांनी दै. 'मुंबई तरुण भारत'ला दिली. तसेच गेल्यावर्षी ‘फ्लेमिंगो दर्शन फेरी’च्या माध्यमातून २५ लाख, ४५ हजार रुपयांचे उत्पन्न गोळा झाल्याचे त्यांनी सांगितले. फ्लेमिंगो सफारीची नोंदणी करण्यासाठी 9987673737 या क्रमांकावर संपर्क साधण्याचे आवाहन कोकरे यांनी पर्यटकांना केले आहे. 

फ्लेमिंगो दर्शन असे 

* ऐरोली केंद्रातून फ्लेमिंगो दर्शनासाठी ठाणे खाडीत सोडल्या जाणाऱ्या बोटींच्या साहाय्याने पर्यटकांना १० किलोमीटर खाडी परिसरात विहार करणाऱ्या फ्लेमिंगोचे दर्शन घडविले जाईल.

* यासाठी साधारण ४५ मिनिटांचा कालावधी लागेल.

* केंद्रामध्ये २४ व्यक्तींसाठी आसनव्यवस्था असलेली बोट आहे. यासाठी प्रतिव्यक्ती ३३० (सोम ते शुक्र) रुपये आकारण्यात येतील, तर शनिवार-रविवारी फेरी शुल्क ४४० रुपये असेल.

* कुटुंब किंवा मित्रमंडळींसोबत एकत्र फ्लेमिंगो दर्शनाचा आनंद लुटण्यासाठी सात आसनी ‘कौस्तुभ’ नावाची बोट उपलब्ध आहे. ही खासगी बोटफेरीकरिता पर्यटकांना पाच हजार रुपये मोजावे लागतील.

* अत्याधुनिक पद्धतीने मांडणी करण्यात आलेल्या 'किनारी व सागरी जैवविविधता केंद्रा'चे शुल्क ५० रुपये आहे.