अन् 'पॅरालीसीस' झालेले बिबट्याचे पिल्लू धावू लागले

वन विभाग आणि 'वाईल्डलाईफ एसओएस' संस्थेच्या प्रयत्नांना यश

मु्ंबई ( अक्षय मांडवकर ) - अर्धांगवायूमुळे ( पॅरालीसीस) जंगलाचा अधिवास गमावलेल्या अवघ्या नऊ महिन्यांच्या बिबट्याला 'माणिकडोह बिबट्या निवारा केंद्रा'तील वनकर्मचाऱ्यांनी जीवदान दिले आहे. तीन महिन्यांपूर्वी संगमनेर येथे जखमी अवस्थेत आढळलेल्या या बिबट्यावर उपचार सुरू होते. अर्धांगवायूमुळे स्वत:च्या पायांवर चालूही न शकणारा हा बिबट्या उपचाराअंती पुन्हा धावू लागला. त्यामुळे सोमवारी रात्री त्याची नैसर्गिक अधिवासात सुटका करण्यात आली.

 

जुलै महिन्यात संगमनेर येथील हिवरगाव-पावसातील शिवारात सहा महिन्यांचे बिबट्याचे पिल्लू जखमी अवस्थेत आढळून आले होते. या पिल्लाच्या शरीरावर ठिकठिकाणी मार लागल्यामुळे त्याला उभे देखील राहता येत नव्हते. त्यामुळे उपचाराकरिता त्याची रवानगी जुन्नर येथील 'माणिकडोह बिबट्या निवारा केंद्रा'त करण्यात आली. केंद्रात दाखल झाल्यावर त्याची वैद्यकीय तपासणी पार पडली. या तपासणीत पिल्लाच्या मानेवर दात रुतल्याच्या खुणा आढळल्या. दुसऱ्या बिबट्याने केलेल्या हल्ल्यात मानेवर जोरदार आघात झाल्याने त्याच्या परिणाम मज्जासंस्थेवर पडला. त्यामुळे पक्षाघात येऊन या पिल्लाचे चारही पाय निकामी झाले. मात्र, अशा परिस्थितीतही 'माणिकडोह बिबट्या निवारा केंद्राती'ल वन आणि 'वाईल्डलाईफ एसओएस' संस्थेच्या कर्मचाऱ्यांनी हार न मानता त्याच्यावर उपचार केले. तीन महिने दिवसरात्र उपचारामध्ये सातत्य ठेवण्यात आले. त्यामुळे त्याच्या प्रकृतीत सुधारणा झाली. अखेरीस सोमवारी रात्री त्याला नैसर्गिक अधिवासात सोडण्यात आले.