जम्मू काश्मीर येथे यासिन मलिकला अटक

 

 

श्रीनगर : जम्मू काश्मीर येथे फुटीरतावादी नेता यासिन मलिक याला पोलिसांनी अटक केली आहे. जम्मू-काश्मीर लिबरेशन फ्रंटचा प्रमुख असलेल्या मलिकला मेसुमा येथील राहत्या घरातून पोलिसांनी ताब्यात घेतले आहे. काश्मीर येथे वाढत्या दहशतवादाला आणि हिंसाचाराला जबाबदार असलेल्या अशा सर्व नेत्यांची, दहशतवाद्यांची तपासणी सध्या सुरु आहे.

 

 

 

 

अटक करण्याचे कारण अद्याप स्पष्ट झालेले नाही, मात्र काश्मीर येथे वाढत्या दहशतवादाला आळा घालण्यासाठी ही कारवाई केली असल्याची शक्यता वर्तविण्यात येत आहे. दरम्यान जम्मू व काश्मीरमध्ये मेहबूबा मुफ्ती सरकार कोसळणे व राज्यपाल राजवट लागू होणे, या राजकीय घडामोडींचा परिणाम भारतीय सैन्यदलाने दहशतवाद्यांविरोधात चालवलेल्या मोहिमेवर होणार नसून दहशतवाद्यांना ठेचणे सुरूच राहणार असल्याचा स्पष्ट निर्वाळा भारताचे लष्करप्रमुख जनरल बिपीन रावत यांनी दिला आहे.

 

आमची मोहीम आम्ही केवळ रमजानच्या काळात थांबवली होती. मात्र, त्यामुळे काय झाले हे आपण पाहिलेच. जम्मू व काश्मीरमध्ये राज्यपाल राजवट लागू झाल्यामुळे आमच्या दहशतवादविरोधी मोहिमेत काहीही खंड पडणार नसून ती आधी जशी सुरु होती तशीच पुढेही सुरू राहील. या मोहिमेत कोणताही राजकीय हस्तक्षेप होत नसल्याचे रावत यांनी स्पष्ट केले. त्यामुळे यापुढे देखील अशा अनेक घडामोडी होण्याची चिन्हे दिसून येत आहेत.