चुरशीच्या कर्नाटक विधानसभा निवडणुका

कर्नाटकातील सत्ता टिकवणे काँग्रेससाठी जीवनमरणाचा प्रश्न आहे. दुसरीकडे भाजपसाठी कर्नाटक म्हणजे दक्षिण भारतात शिरण्याचा दरवाजा. एक राष्ट्रीय पक्ष म्हणून भाजपचे दक्षिण भारतातील अस्तित्व नगण्य आहे.

अपेक्षेप्रमाणे मागच्या आठवड्यात केंद्रीय निवडणूक आयोगाने कर्नाटक विधानसभा निवडणुकांचे वेळापत्रक जाहीर केले. त्यानुसार कर्नाटकातील २२४ मतदारसंघात एकाच दिवशी म्हणजे १२ मे रोजी मतदान होईल व १५ मे रोजी निकाल जाहीर होतील. कर्नाटक विधानसभा निवडणुकांनंतर या वर्षीच्या शेवटाला मध्य प्रदेश, राजस्थान व छत्तीसगड या तीन राज्यांत विधानसभा निवडणुका होणार आहेत व त्यानंतर पुढच्या वर्षी लोकसभा निवडणुका. यातील कर्नाटक विधानसभा निवडणूक कमालीची महत्त्वाची आहे. येथे भाजप व काँग्रेस हे दोन्ही राष्ट्रीय पक्ष सरळसरळ एकमेकांसमोर उभे ठाकले आहेत. तेथे माजी पंतप्रधान देवेगौडा यांचा ‘जनता दल (सेक्युलर)’ हा तिसरा प्रादेशिक पक्ष जरी रिंगणात असला तरी खरी लढत भाजप व काँग्रेस यांच्यातच आहे. कर्नाटकातील निवडणुका आणखी एका कारणासाठी महत्त्वाच्या आहेत. कारण, तेथे सध्या काँग्रेसची सत्ता आहे.