अजून यौवनात मी

काल परत एकदा एका वृत्तपत्रात ‘ब्रेकिंग न्यूज’ वाचली की काँग्रेसच्या सूत्रांनुसार लवकरच काँग्रेस पक्षाच्या अध्यक्षपदावर राहुल गांधी यांची नेमणूक करण्यात येईल. आता ही ‘ब्रेकिंग न्यूज’ काही भारतीय वाचकांना नवीन नाही. राहुल गांधी कॉंग्रेसचे नवे अध्यक्ष होणार अश्या बातम्या गेली कित्येक वर्षे प्रसारमाध्यमांमधून दर सहा महिन्यांनी छापून येतच असतात आणि आता पन्नाशीकडे झुकलेल्या ह्या ‘युवा’ नेत्याच्या सळसळत्या, तारुण्यसुलभ वगैरे उत्साहाचे कौतुक पत्रकार मंडळी भरभरून करत असतात. मग राहुल गांधी एखादे भाषण-बिषण ठोकतात आणि त्या भाषणाचे मिडियामधून वारेमाप कौतुक होते. ‘राहुल गांधी आता राजकीय दृष्ट्या वयात आले’ अश्या गर्जना केल्या जातात. पण इतकी वर्षे झाली तरी हे बाळ काही जाणते होण्याचे नाव घेत नाही.

दिल्लीमध्ये काल काँग्रेस पक्षाने ‘जनवेदना संमेलन’ ह्या नावाखाली एक सभा घेतली. ह्या सभेत राहुल गांधींनी म्हणे जनतेला ‘डरो मत’ असा संदेश दिला. ह्या संमेलनाचा सगळा भर हा केवळ राहुल गांधी ह्यांची राजकीय कारकीर्द परत एकदा धक्का मारून सुरु करून देणे एवढाच असल्यामुळे, त्यांच्या भाषणाबद्दल सगळ्याच मिडियामधून भरभरून लिहून आले आहे. मोदी सरकारने सर्व लोकशाही संस्थांचा अनादर केला आहे. आमच्या सरकारने ७० वर्षे ह्या सर्व संस्था अत्यंत आदरपूर्वक जतन केल्या असा दावा राहुल गांधींनी आपल्या भाषणात केला. आपल्या आजीने जवळ जवळ दोन वर्षे ह्या देशात आणीबाणी आणली होती, तेव्हा मिडीयासकट सगळ्यांचेच स्वातंत्र्य हिरावून घेतले गेले होते. लोकनियुक्त सरकारे पाडली गेली होती. सर्व कायदे धाब्यावर बसवून न्यायाधीशांच्या नियुक्त्या केल्या गेल्या होत्या. बावीस हजार लोकांना मिसा कायद्याखाली तुरुंगात टाकलं होतं ह्या सर्व गोष्टींचा राहुल गांधी ह्यांना सोयीस्करपणे विसर पडलेला दिसतो!

‘जगात सगळीकडे आपल्या पंतप्रधानांची खिल्ली उडवली जाते’ असे म्हणताना राहुल गांधी ह्यांच्या डोळ्यांपुढे कदाचित नवाज शरीफ ह्यांनी ‘देहाती औरत’ म्हणून हिणवलेले युपीएच्या काळातले पंतप्रधान मनमोहन सिंग असावेत. ह्याच राहुल गांधी ह्यांनी आपल्याच काँग्रेस सरकारने सिंग पंतप्रधान असताना काढलेला वटहुकूम भर पत्रकार परीषदेत जाहीर रित्या फाडून टाकून आपण सिंग ह्यांच्या निर्णयाचा किती आदर करतो ते सगळ्या जगाला दाखवून दिले होते. मागे वृत्तपत्रातून एक छायाचित्र छापून आले होते. राहुल गांधी आणि सोनिया गांधी होळीला लोकांना भेटत होते आणि मागे मनमोहन सिंग हातात मिठाईचा खोका घेऊन नोकरासारखे हात बांधून उभे होते. आपल्याच सरकारच्या माजी पंतप्रधानाला अशी वागणूक देणाऱ्या व्यक्तीने असे बोलावे हे खरोखरच हास्यास्पद आहे.