वर्ष संपण्याच्या आत या वेब सीरीज नक्की बघा

वर्ष २०१६ आता संपायला आले आहे. या वर्षात बरेच काही घडून गेले. नवीन सिनेमे आले. नवीन नट नट्या आल्या. टी.व्ही चॅनल्स वर अनेक नवीन मालिकाही आल्यात. पण या वर्षातील सगळ्यात एक्सायटिंग गोष्ट म्हणजे अनेक वेब चॅनल्स आणि वेब मालिका उदयाला आल्या. जे काही टी.व्ही चॅनल वरच्या मालिकेत दाखवता येत नाही, ते या मालिकांमध्ये दाखवता येतं असं म्हणतात. मग ते हटके विषय असू देत किंवा आजच्या जनरेशनची भाषा. पण या वेगळेपणामुळेच या वेब सीरीयल्स यंगिस्तानला भावल्या आहेत. या मालिकांचं भाव विश्वच वेगळं आहे. नेहमीच्या मालिकांप्रमाणे याचा वेळही निश्चित नाही, काही भाग १५ मिनिटांचे तर काही २०. आणि लांब लचक चालणाऱ्या या मालिकाही नाहीत. ५-१० भागांहून जास्त मोठी यातील एकही मालिका नाही. बघूया २०१६ मधील काही अशाच एक्सायटिंग मालिका...

१. गर्ल इन द सिटि :

नावा वरुनच कळतं एका नवीन शहरात आलेल्या मुलीची ही कहाणी आहे. या मुलीचं नाव मीरा सेहगल. देहरादून सारख्या छोट्याशा सुंदर शहरातून मुंबईच्या गर्दीत आपलं "फॅशन डिझायनर" होण्याचं स्वप्न घेवून आलेली ही मुलगी. आर्मी बॅकराउंड असल्याने अत्यंत सुरक्षित वातावरणात वाढलेली. मुंबई ला आल्यावर सगळं जगच नवीन. त्यातून हिटलर बॉस, बिंदास मैत्रीण, ऑफिसमध्ये सततचे घोळ आणि या सगळ्याशी डील करणारी (सतत फोटो काढून हॅशटॅग वापरणारी) अत्यंत गोड निरागस आणि स्टायलिश मीरा. हटके विषय आणि हटके अभिनय बघायचा असेल तर ही मालिका आवर्जून बघावी. मराठमोळ्या मिथिला पालकर हिने या मालिकेत मुख्य भूमिका साकारली आहे. ही मालिका बिंदास चॅनलवर देखील आली. मात्र इंटरनेटवर त्याला सर्वाधिक प्रतिसाद मिळाला.