भिंतीवरी कालनिर्णय असावे..

लहानपणी मित्र मैत्रीणीं कट्ट्यावर जमले की त्यांच्यात कालनिर्णयचं गाणं कोण जास्त छान म्हणू शकेल अशी स्पर्धा व्हायची. आणि सगळे एक सुरात ते गाणं म्हणायचे. कालनिर्णयच्या जाहिरातींसोबत महाराष्ट्रातील विविध ठिकाणच्या अनेक लोकांच्या आठवणी जोडलेल्या आहेत. आजही ते समोर आले की त्या आठवणी ताज्या होतात.

एखाद्या वस्तुच्या विक्रीचा प्रतिसाद त्याच्या सादरीकरणावरून ठरतो. एखाद्या साध्याशा वस्तुचे प्रस्तुतीकरण योग्य असेल तर त्याची विक्री मोठ्या प्रमाणात होवू शकते, तर एखादी वस्तु उत्तम असेल, मात्र त्याचे प्रस्तुतीकरण योग्य नसेल तर काहीही केलं तरी त्याची विक्री होणार नाही. जाहिरातींनी हेच सिद्ध केले आहे. आम्ही सहज गप्पा मारत असताना एक मैत्रीण म्हणाली, "एखाद्या कॅलेंडरची इतक्या मोठ्या प्रमाणात विक्री व्हावी यामागे त्याच्या जाहीराती यशस्वी करण्यासाठी घेतलेली मेहनत आहे. आणि या कालनिर्णयच्या जाहीरातींमधून ते दिसून येतं." त्यावर लगेच एक मित्र म्हणाला की, "अगं पण त्यासाठी वस्तु पण तितकीच उच्च दर्ज्याची असणं आवश्यक आहे." खरंय कालनिर्णयनं या दोन्हीची उत्तम सांगड घातली आहे.