‘लास्ट माईल कनेक्टिव्हिटी’साठी मुंबईत स्वतंत्र प्राधिकरण

 

मुंबई: ( Independent authority in Mumbai for Last Mile Connectivity ) “मुंबईत नागरिकांच्या ‘ईज ऑफ लिव्हिंग’साठी शहरी परिवहन व्यवस्थेमध्ये आमूलाग्र बदल आवश्यक आहे,” असे स्पष्ट करत “यासाठी ‘एकात्मिक महानगर वाहतूक प्राधिकरण’ (युनिफाईड मेट्रोपॉलिटीन ट्रान्सपोर्ट ऑथोरिटी) स्थापन करावे,” असे निर्देश मुख्यमंत्री देवेंद्र फडणवीस यांनी दिले.

 

या प्राधिकरणाच्या कायद्यासाठी जनतेकडून सूचना व हरकती घेण्यात येणार आहेत. मुख्यमंत्री फडणवीस यांच्या अध्यक्षतेखाली ‘सह्याद्री’ अतिथीगृह, मुंबई येथे ’युनिफाईड मेट्रोपॉलिटन ट्रान्सपोर्ट ऑथोरिटी (यूएमटीए) बिल, 2025’च्या संदर्भात आढावा बैठक पार पडली.

 

“राज्यातील महानगरांच्या शहरी क्षेत्रातील वाहतूक प्रकल्पांचे नियोजन, नियमन आणि बजेट तयार करण्याच्या पद्धतीमध्ये ‘यूएमटीए’ची स्थापना एक परिवर्तनकारी पाऊल आहे,” असे मुख्यमंत्री देवेंद्र फडणवीस म्हणाले. बर्‍याच काळापासून शहरी वाहतूक व्यवस्था अनेकविध भागांमध्ये विखुरलेल्या आहेत. यासंदर्भात महानगरपालिका, ‘राज्य परिवहन महामंडळ’, ‘मेट्रो’ आणि रेल्वे यांनी स्वतंत्रपणे आपापल्या व्यवस्था स्थापित केलेल्या आहेत. अनेक यंत्रणांच्या या बहुविविधतेमुळे अनेकदा जबाबदार्‍यांमध्ये समन्वय, आव्हाने आणि प्रकल्प अंमलबजावणीत विलंब होतो.

 

 

मुख्यमंत्री म्हणाले की, “सध्या वेगवेगळ्या महानगरांमध्ये विविध यंत्रणांमार्फत कार्यरत असलेल्या परिवहन सेवा एकत्रित व सुसूत्र करण्यासाठी हे प्राधिकरण उपयुक्त ठरणार आहे. त्यात ’मुख्य कार्यकारी अधिकारी’ हे स्वतंत्र पद असावे. तसेच महापौर, मनपा आयुक्तांचाही त्यात समावेश असावा.

 

या माध्यमातून विविध सेवा एकाच दरात उपलब्ध होऊन नियोजन एकसंध राहील. हे करताना राज्य व केंद्राच्या नियमांचा भंग होणार नाही, याची दक्षता घेण्यात यावी. शहरात सुरू असलेल्या प्रकल्पांना वेग देणे, एकच नियामक यंत्रणा ठेवणे आणि ’लास्ट माईल कनेक्टिव्हिटी’ सुनिश्चित करणे, या प्राधिकरणाच्या कामाचे केंद्रबिंदू असतील. प्रत्यक्ष अंमलबजावणी महापालिकेकडे राहील, तर नियोजन आणि सल्लागार भूमिका हे प्राधिकरण पार पाडेल.”