भाजपच्या संविधान गौरव यात्रेला ठाण्यात उसळला भीमसागर

 

 

ठाणे : ( BJP Samvidhan Gaurav Yatra Thane ) भारतीय जनता पार्टी ठाणे शहर जिल्हातर्फे आणि ठाण्याचे आमदार संजय केळकर यांच्या पुढाकाराने डॉ. बाबासाहेब आंबेडकर जयंती निमित्त व भारतीय संविधान अमृत महोत्सवर्षानिमित्त ठाण्यात काढण्यात आलेल्या भव्य संविधान गौरव यात्रेला भीमसागर उसळला.

 

बौद्ध धर्मगुरू १ व भन्ते यांच्या उपस्थितीत सकाळी निघालेल्या या रॅलीत आमदार निरंजन डावखरे, भाजपा ठाणे जिल्हाध्यक्ष संजय वाघुले, माजी नगरसेवक संदीप लेले, नारायण पवार, भरत चव्हाण, मृणाल पेंडसे, सुरेश कांबळे, युवा मोर्चा अध्यक्ष सुरज दळवी, सचिन पाटील, राजेश गाडे, विशाल वाघ, कृपाल कांबळे, प्रदीप जाधव व असंख्य भीमसैनिक व कार्यकर्ते सहभागी झाले होते. ही रॅली मोठ्या उत्साहत पार पडली. डॉ. बाबासाहेब आंबेडकरांच्या जयघोषाने वातावरण भीममय झाले होते.

 

भाजपच्या खोपट कार्यालयात डॉ. बाबासाहेब आंबेडकरांच्या तसबीरीला पुष्पहार घालून बौद्ध भन्ते यांच्या उपस्थितीत वंदना घेऊन रॅलीला प्रारंभ झाला. आंबेडकर रोड, कोर्ट नाका येथील संविधान चौक, डॉ बाबासाहेब आंबेडकर पुतळा व पुढे बाजारपेठेतून ठाणे रेल्वे स्टेशन येथील डॉ. बाबासाहेब आंबेडकरांच्या पुतळ्याजवळ रॅली समाप्त झाली.

 

डॉ. बाबासाहेब आंबेडकर रोडवर उपस्थित नागरिकांनी रॅलीचे जोरदार स्वागत केले. या ठिकाणी जयंती साजरी करण्यात आली आहे. या कार्यक्रमाला आ. केळकर, आ. डावखरे यांनी भेट देऊन नागरिकांना शुभेच्छा दिल्या. पुढे कोर्ट नाका येथील अशोक स्तंभ येथे असलेल्या संविधान प्रतिकृतीवर मान्यवरांनी पुष्पसृष्टी केली. डॉ. बाबासाहेबांच्या नावाचा जयजयकार करून रॅली जल्लोषात निघाली होती, त्यानंतर डॉ. बाबासाहेबांच्या पुतळ्यास पुष्पहार घालण्यात आला.

 

बाजारपेठेतून रॅली जात असताना दुकानदारांनी रॅलीवर व बाबासाहेबांच्या तसबीरीवर फुलांचा वार्षाव केला. स्टेशन रोडवर डॉ. बाबासाहेब आंबेडकरांच्या पुतळ्यास मान्यवरांच्या हस्ते पुष्पहार घालून रॅलीचा समारोप करण्यात आला.

 

 

ठाणे नगरी ही डॉ. बाबासाहेबांच्या पदस्पर्शाने पावन झालेली नगरी आहे. डॉ. आंबेडकरांमुळे आपल्याला घटना मिळाली. न्याय, हक्क मिळाला. या घटनेचा व आपल्या कर्तव्याचा आदर करण्याचा संकल्प आपल्याला डॉ. बाबासाहेबांनी दिला. सर्वांचा विकास सामाजिक न्याय बाबत कटीबद्ध असावे, ही शिकवण बाबासाहेब आंबेडकर यांनी दिली.

 

- संजय केळकर, आमदार