दीनानाथ मंगेशकर रुग्णालयाने ३० कोटींचा निधी वापरलाच नाही! अहवालात धक्कादायक माहिती उघड

 

 

पुणे : दीनानाथ मंगेशकर रुग्णालयाने गरीबांसाठी असलेला ३० कोटी रुपयांचा निधी वापरलाच नसल्याची धक्कादायक माहिती धर्मादाय सहआयुक्तांच्या अध्यक्षतेखाली स्थापन करण्यात आलेल्या समितीच्या अहवालातून पुढे आली आहे. तसेच गर्भवती महिलेच्या मृत्यूप्रकरणी दीनानाथ रुग्णालय दोषी असल्याचेही या अहवालात स्पष्ट झाले आहे.

 

दीनानाथ मंगेशकर रुग्णालयाने वेळेत उपचार न केल्याने तनिषा भिसे या गर्भवती महिलेचा मृत्यू झाल्याच्या घटनेने राज्यभरात संतापाची लाट उसळली आहे. दरम्यान, या घटनेच्या चौकशीसाठी धर्मादाय सहआयुक्तांच्या अध्यक्षतेखाली एक चौकशी समिती गठित करण्यात आली होती. या समितीमध्ये मंत्रालयातील वरिष्ठ अधिकारी, धर्मादाय रुग्णालय मदत कक्षाचे अधिकारी, जे.जे. रुग्णालयाचे अधीक्षक, विधी व न्याय विभागाचे उपसचिव/अवर सचिव होते. या समितीने आपला अहवाल सादर केला असून यात अनेक धक्कादायक बाबी उघड झाल्या आहेत.

 

गर्भवती महिलेच्या मृत्यूप्रकरणी दीनानाथ मंगेशकर रुग्णालय दोषी असल्याचे अहवालात आढळून आले आहे. दीनानाथ मंगेशकर रुग्णालयाकडून गरीब रुग्णांसाठीचा ३० कोटींहून अधिक रुपयांचा निधी वापरण्यातच आला नसल्याचा ठपका या अहवालात ठेवण्यात आला आहे.

 

 

राज्यात ४८६ धर्मादाय रुग्णालये असून गरीब रुग्णांना चांगले उपचार मिळण्यासाठी या रुग्णालयांमध्ये बेड्स आरक्षित असतात. उच्च न्यायालयाने २००४ मध्ये दिलेल्या निकालानुसार, धर्मादाय रुग्णालयांमध्ये निर्धन, गरीब रुग्णांसाठी २० टक्के बेड्स राखीव ठेवणे बंधनकारक आहे. ज्या कुटुंबाचे वार्षिक उत्पन्न १ लाख ८० हजारांपर्यंत आहे, अशा रुग्णांकरिता १० टक्के बेड्स आरक्षित असून त्यांच्यावर मोफत उपचार करणे अपेक्षित आहे. तसेच १ लाख ८० हजार ते ३ लाख ६० हजारांपर्यंत वार्षिक उत्पन्न असलेल्या कुटुंबातील रुग्णांसाठी १० टक्के बेड्स आरक्षित ठेवणे बंधनकारक आहे. या रुग्णांना ५० टक्के सवलतीच्या दरात उपचार देणे आवश्यक आहे.

 

 

दीनानाथ मंगेशकर रुग्णालयातील डॉ. सुश्रृत घैसास आणि डॉ. धनंजय केळकर यांच्यावर गुन्हा दाखल करा अशी मागणी भिसे कुटुंबियांकडून करण्यात आली आहे. दरम्यान, त्यांनी अलंकार पोलिस ठाण्यात तक्रारही दाखल केली आहे.