उद्धव ठाकरेंचे शिबीर

 

स्थानिक स्वराज्य संस्थांच्या निवडणुकांचे रणशिंग फुकण्यासाठी म्हणा किंवा कार्यकर्त्यांचे मनोधैर्य उंचावण्यासाठी म्हणा, उद्धव ठाकरेंनी ‘मातोश्री’च्या बाहेर पाऊल टाकण्याचा निर्णय घेतला. मुंबई पाठोपाठ नाशिक मनपाच्या सत्तेत ठाकरे यांचा जीव अडकल्याचे वेळोवेळी समोर आले. राज ठाकरे शिवसेनेत असताना नाशिकमध्ये शिवसेनेचा झेंडा कसा डौलत राहील, साठी त्यांनी सातत्याने प्रयत्न केले. परंतु, अडगळीत टाकण्याचे षड्यंत्र सुरू झाल्यानंतर उद्विग्न मनस्थितीत त्यांनी पक्ष सोडला. त्यानंतर भाजपच्या मदतीने ठाकरे यांचा विजयरथ नाशिक मनपात पुढे सुरू राहिला. पण, ठाकरेंच्या कुरघोडीच्या राजकारणामुळे मनपा निवडणुकीत भाजप आणि शिवसेना एकमेकांविरोधात लढले. नाशिककरांनी भाजपच्या पारड्यात मतांचे दान टाकत ठाकरेंना चारीमुंड्या चित केले. त्यानंतर विश्वप्रवक्ते संजय राऊत यांच्याकडे नाशिकची सुभेदारी सोपवली गेली. परंतु, उद्धव ठाकरे यांच्या आडून सूडबुद्धीचे राजकारण करणार्‍या संजय राऊत यांना कंटाळत एकनाथ शिंदे यांनी शिवसेनेत बंड करत ठाकरेंना आव्हान दिले. या बंडाच्या काळात नाशिकमधील पदाधिकार्‍यांनी काही काळ ठाकरेंना साथसंगत केली. परंतु, नाशिकचे संपर्कप्रमुख असलेल्या संजय राऊत यांच्या कार्यपद्धतीला कंटाळून पहिल्या फळीतील अनेक पदाधिकार्‍यांनी शिंदे यांचे नेतृत्व मान्य करत शिवसेनेचा मार्ग पत्करला. अगदी महिनाभरापूर्वीदेखील उबाठा गटाला मोठे खिंडार पडता पडता राहिले. सर्व जगाचे ज्ञान असणारे राऊत उबाठा गटाकडून दि. 16 एप्रिल रोजी नाशकात पार पडणार्‍या कार्यकर्ता शिबिरात मार्गदर्शन करणार असल्याचे सांगितले जात आहे. आता संजय राऊत आपल्या पोपटपंचीतून कोणता वाद निर्माण करणार, या विचाराने नाशिककरांच्या पोटात आतापासूनच भीतीचा गोळा आला आहे. कारण, राऊतांनी तोंड उघडले की शांततेत भंग झाल्याचा अनुभव जनतेने घेतला आहे. त्यामुळे दि. 16 एप्रिल रोजीनंतर नाशिकची शांतता भंग होणार नाही ना, या विचारात नाशिककर पडले आहे. कारण, एखादा नेता येतो. आपले विखारी विचार मांडून परत स्वगृही परततो. मात्र, त्याच्या बोलण्याने हिंसक वळण मिळाले की, त्याचा त्रास स्थानिक जनतेलाच सोसावा लागतो. म्हणून कधीकाळी उद्धव ठाकरेंसाठी सत्तेच्या पायघड्या अंथरणार्‍या नाशिकमध्ये कोणताही अनुचित प्रकार घडू नये, एवढेच विश्वप्रवक्त्यांना सांगणे.