L2 Empuraan worldwide box office collection day 2: दोन दिवसात तब्बल १०० कोटींच्या घरात कमाई करणारा ॲक्शन चित्रपट L2: एंपुराण पाहिलातं का?

 

 

 

 

चित्रपटाच्या अधिकृत पोस्टरमध्ये मोहनलाल अॅक्शन मोडमध्ये दिसत असून ते जळणाऱ्या जंगलात उभे आहेत. “१०० कोटी क्लब - इतिहास निर्माण करत आहे,” असे पोस्टरवरील मजकूरात लिहिले आहे. हा पोस्टर शेअर करत आशिर्वाद सिनेमा यांनी लिहिले, "#L2E #Empuraan ने जागतिक स्तरावर ४८ तासांच्या आत १०० कोटींचा टप्पा ओलांडला आहे, ज्याने सिनेमा इतिहासात नवीन मानक प्रस्थापित केली आहेत. या अभूतपूर्व यशाचा भाग बनल्याबद्दल आपले मनःपूर्वक आभार! तुमच्या प्रेमामुळे आणि पाठिंब्यामुळे हे शक्य झाले!"

सॅकनिल्क नुसार, आतापर्यंत एकूण १० मल्याळम चित्रपटांनी जागतिक स्तरावर १०० कोटीहून अधिक कमाई केली आहे, ज्यात L2: एंपुराण सर्वात जलद गतीने हा टप्पा पार करणारा ठरला आहे. या चित्रपटाने पहिल्या दिवशी ६७.५० कोटींची एकूण कमाई केली. त्यातील परदेशातील कलेक्शन ४३ कोटी होते. दुसऱ्या दिवशीही चित्रपटाने जागतिक स्तरावर ३२.५ कोटींची कमाई केली.

 

मोहनलाल यांच्या कारकीर्दीतील हा तिसरा १०० कोटींचा गाजलेला चित्रपट आहे. यापूर्वी पुलिमुरुगन आणि लूसिफर यांनी हा टप्पा गाठला होता. दिग्दर्शक म्हणून पृथ्वीराज सुकुमारन यांचा हा दुसरा १०० कोटी गाठणारा चित्रपट आहे. सॅकनिल्क च्या अहवालानुसार, हा चित्रपट आतापर्यंतच्या पाच सर्वाधिक कमाई करणाऱ्या मल्याळम चित्रपटांपैकी एक होण्याची शक्यता आहे. येत्या सोमवारी येणाऱ्या ईदच्या सुट्ट्यांमुळे हा चित्रपट पहिल्याच आठवड्यात मंजुम्मेल बॉईज च्या आजपर्यंतच्या २४१ कोटींच्या लाइफटाइम वर्ल्डवाइड कलेक्शनला मागे टाकत सर्वात मोठा मल्याळम चित्रपट ठरू शकतो.

 

 

L2: एंपुराण हा मल्याळम सिनेसृष्टीतील सर्वात महागड्या चित्रपटांपैकी एक मानला जातो. या चित्रपटाची निर्मिती अँटोनी पेरुंबवूर, गोखुलम गोपाळन आणि सुबास्करण अल्लिराजा यांनी केली आहे. मुरली गोपी यांनी चित्रपटाची पटकथा लिहिली आहे.

 

या चित्रपटात मोहनलालसोबत पृथ्वीराज सुकुमारन, टोविनो थॉमस, अभिमन्यू सिंग, मंजू वॉरियर, जेरोम फ्लिन आणि एरिक एबॉआनी यांसारखे कलाकार दिसणार आहेत. L2: एंपुराण हा लूसिफर या चित्रपटाचा सिक्वेल आहे आणि तो गुरुवारी प्रदर्शित झाला.