सुषमा अंधारे आणि कुणाल कामराविरोधात विधान परिषदेत हक्कभंग प्रस्ताव

 

 

मुंबई : स्टँडअप कॉमेडियन कुणाल कामरा याने उपमुख्यमंत्री एकनाथ शिंदे यांच्यावर केलेले गाणे आणि उबाठा गटाच्या नेत्या सुषमा अंधारे यांनी युट्यूबच्या माध्यमातून हेच गाणे पुन्हा टीकात्मक आविर्भावात गाऊन दाखवल्यामुळे त्या दोघांवरही बुधवार, २६ मार्च रोजी विधानपरिषदेत हक्कभंग प्रस्ताव मांडण्यात आला. भाजप गटनेते आमदार प्रवीण दरेकर यांनी हा हक्कभंग प्रस्ताव दाखल केला.

 

सभागृहात बोलताना आ. प्रवीण दरेकर म्हणाले की, "एक प्रकारे हा सभागृहाचा किंबहुना सभागृहातील सगळ्या सदस्यांचा अवमान आहे. त्यांनी एकप्रकारे सभागृहातील सदस्यांना डिवचण्याचा प्रयत्न केला असून ही बाब अत्यंत गंभीर आहे. हे सभागृह सर्वोच्च आहे आणि या सभागृहाचा अवमान आम्ही सहन करणार नाही. शिवसेना उबाठा गटाच्या प्रवक्त्या सुषमा अंधारे यांनी कामरा यांचा स्टुडिओ फोडल्याप्रकरणी यूट्यूब, सोशल मीडियाच्या माध्यमातून बाईट दिली. उपमुख्यमंत्री एकनाथ शिंदे यांना व्यक्तिगत हिणवणारे गीत करताना कुणाल कामराने जाणूनबुजून हेतुपुरस्सर त्यांची अवहेलना केली असल्याचे स्पष्ट होते."

 

"सुषमा अंधारे यांनी या सभागृहाचा अपमान करण्याचे धाडस केले आहे. त्यांनी आपल्या निवेदनात संस्कृती आणि शाब्दिक मर्यादांचे उघडपणे उल्लंघन केले. आपण राज्याच्या उपमुख्यमंत्र्यांविषयी बोलत आहोत याचे भानही त्यांनी ठेवले नाही. तथाकथित प्रसिद्धीसाठी उपमुख्यमंत्री पदावर असलेल्या आणि एका राजकीय पक्षाच्या प्रमुखाविषयी सोशल मीडियाच्या माध्यमातून अशा प्रकारे भाष्य करणे नैतिक मूल्यांचे अवमुल्यन आहे. अंधारे यांनी बोलताना वापरलेली खालच्या पातळीवरील भाषा आणि कुणाल कामराने हेतूपूरस्पर उपमुख्यमंत्री यांच्यावर वैयक्तिक आणि उपरोधिक केलेले गाणे यातील भाषा एकप्रकारे सभागृहाचा अवमान करणारी आहे. त्यामुळे कुणाल कामरा आणि सुषमा अंधारे यांच्याविरोधात हक्कभंग मांडण्यास अनुमती द्यावी," अशी विनंती प्रवीण दरेकर यांनी केली. यावर विधानपरिषद सभापती राम शिंदे यांनी हे प्रकरण विशेषाधिकार समितीकडे योग्य त्या कारवाईसाठी पाठवत असल्याचे जाहीर केले.

 

"कुणाल कामराने ज्यापद्धतीने उपमुख्यमंत्री एकनाथ शिंदे यांच्यावर टीका केली त्यावर सभागृहात विरोधी आणि सत्ताधारी पक्षांनी चर्चा केली. यामध्ये सरकारने निवेदन केले. परंतू, निवेदन केल्यानंतरही कुणाल कामराचा अहंकार कमी झाला नाही. त्याने त्याच्या अहंकाराची भाषा दाखवलीच पण सुषमा अंधारे ताईंनीदेखील पुन्हा एकदा तीच कविता रिपीट केली. एखाद्या विषयावर सभागृहात सरकार निवेदन करते तेव्हा तो विषय सभागृहाचा सदस्य नसलेल्या व्यक्तीला सभागृहाच्या बाहेर बोलण्याचा अधिकार नाही. त्यामुळे सभागृहाचा अवमान करण्याचे हे प्रकरण आहे. गटनेते प्रवीण दरेकर यांनी हक्कभंग प्रस्ताव मांडला असून सभापतींनी ते स्वीकृत केला. आता सभापती महोदय हक्कभंग समितीकडे तो पाठवतील. मी हक्कभंग समितीचा अध्यक्ष असल्याने त्यावर आताच काही बोलणे योग्य नाही. परंतू, त्याचा अभ्यास करून कायदेशीरपणे चौकशी केली जाईल. त्यानंतर आम्ही निर्णय घेऊ."

 

- आमदार प्रसाद लाड, हक्कभंग समिती अध्यक्ष