हुक्का पार्लर चालवणार्‍या उपाहारगृहाचा परवाना कायमचा रद्द करणार!

 

 

मुंबई: ( Chief Minister Devendra Fadnavis on license of restaurant runs hookah parlor )  “वर्ष २०१८ मध्ये अवैध हुक्का पार्लरवर बंदी घातली आहे. त्यासाठी कायदा तयार केला आहे. त्यात अत्यावश्यक सुधारणा करण्यात येतील. यापुढे अवैध हुक्का पार्लर चालू करताना दुसर्‍यांदा सापडल्यास सहा महिन्यांसाठी उपाहारगृहाचा परवाना रद्द करण्यात येईल. तसेच तिसर्‍यांदा सापडला, तर परवाना कायमचा रद्द करण्यात येईल. तसेच संबंधित दोषी मालकांवर अजामीनपात्र गुन्हा नोंद केला जाईल,” असा इशारा गृहमंत्री तथा मुख्यमंत्री देवेंद्र फडणवीस यांनी मंगळवार, दि. २५ मार्च रोजी विधानसभेत दिला.

 

आ. सुनील कांबळे आणि संजय केळकर यांनी राज्यातील अवैध हुक्का पार्लरविषयी हा तारांकित प्रश्न विचारला होता. यावेळी झालेल्या चर्चेत आ. सुधीर मुनगंटीवार, विश्वजित कदम, नाना पटोले यांनी सहभाग घेतला होता. मुख्यमंत्री म्हणाले की, “अवैध हुक्का पार्लर पोलिसांनी उघडकीस आणला, तर त्यांच्यावर कारवाई होणार नाही. मात्र, इतरांनी अवैध हुक्का पार्लर उघडकीस आणला, तर उत्तरदायी पोलिसांवर कारवाई केली जाईल.

 

हा गंभीर विषय आहे. हुक्का ओढणे ही ‘फॅशन’ झाली आहे. काही ठिकाणी तंबाखू असते, काही ठिकाणी नसते. बरेचजण अमली पदार्थ, चिलीम ओढतात. एके ठिकाणी धाड घातल्यावर शाळेतील मुले आढळली होती. यासाठी कायदा कडक करण्याविषयी निर्देश देण्यात येतील. अलीकडील काळात अनेक ठिकाणी इलेक्ट्रॉनिक सिगारेट दिसते. त्यावर बंदी आहे. बर्‍याच ठिकाणी धाडी घालून त्याचा व्यवहार करणार्‍यांवर कारवाई केलेली आहे,” असेही मुख्यमंत्र्यांनी सांगितले.