बस चालवत मोबाईल वर मॅच बघणं पडलं महागात! चालक बडतर्फ

 

 

मुंबई : बस चालवत मोबाईलवर क्रिकेट मॅच बघणे एका खाजगी बस चालकाला चांगलेच महागात पडले. या चालकाला एसटी प्रशासनाने बडतर्फ केले आहे. तसेच परिवहन मंत्री प्रताप सरनाईक यांच्या निर्देशानुसार संबंधित खाजगी कंपनीला ५ हजार रुपयांचा दंड ठोठावला आहे.

 

दिनांक २१ मार्च रोजी सायंकाळी ७ वाजता दादर येथून स्वारगेट (पुणे) साठी निघालेल्या खाजगी ई-शिवनेरी बसमधील चालक रात्री लोणावळा जवळ बस चालवत क्रिकेट मॅच पाहत होता. संबंधित बसमधून प्रवास करणाऱ्या प्रवाशांनी यासंबंधी चित्रीकरण करून ते परिवहन मंत्री प्रताप सरनाईक यांना पाठवल्यानंतर त्यांनी तातडीने एसटीच्या वरिष्ठ अधिकाऱ्यांना कठोर कारवाई करण्याचे निर्देश दिले. दरम्यान, एसटीच्या स्थानिक अधिकाऱ्यांनी संबंधित खाजगी संस्थेच्या चालकास बडतर्फ केले असून त्या संस्थेला ५ हजार रुपये इतका दंड ठोठावला आहे.

 

 

यावर बोलताना मंत्री प्रताप सरनाईक म्हणाले की, ई-शिवनेरी ही एसटीची मुंबई -पुणे मार्गावर धावणारी प्रतिष्ठित बस सेवा असून या बसमधून अनेक व्यक्ती प्रवास करतात. अपघातविरहित सेवा हा या बससेवेचा नावलौकिक आहे. त्यामुळे अशा प्रकारे बेशिस्त वाहन चालवून प्रवाशांचा जीव धोक्यात घालणाऱ्या चालकांवर कठोर कारवाई करणे गरजेचे आहे. यामुळे एसटीच्या या प्रतिष्ठित सेवेबद्दल प्रवाशांचा विश्वास दृढ होत जाईल. भविष्यात एसटीकडे असलेल्या खाजगी बसच्या चालकांना संबंधित संस्थेकडून वेळोवेळी शिस्तबद्ध वाहन चालवण्याचे प्रशिक्षण देण्याची गरज त्यांनी व्यक्त केली.

 

"खाजगी अथवा प्रवासी वाहतूक करणाऱ्या रिक्षा, टॅक्सीचे चालकदेखील कानात हेडफोन घालून गाडी चालवत मोबाईलवर मॅच अथवा चित्रपट पाहत असल्याच्या तक्रारी प्रवासी वर्गाकडून येत आहेत. यासंदर्भात परिवहन विभागाकडून लवकरच नवीन नियमावली निश्चित करून अशा चालकांच्यावर निर्बंध आणले जातील."

 

- प्रताप सरनाईक, परिवहन मंत्री