'उबाठा'चे नेते लपून-छपून भाजपश्रेष्ठींना भेटून आले - एकनाथ शिंदे यांचा गौप्यस्फोट

नागपूर येथे घडलेल्या हिंसाचाराबाबत एकनाथ शिंदे यांनी विधान परिषदेत निवेदन दिले. अबू आझमी यांनी औरंगजेबाबद्दल केलेल्या विधानाचा उल्लेख करीत शिंदे यांनी त्यांच्यावर प्रहार केला. उबाठा गटाचे आमदार अनिल परब यांनी काही दिवसांपूर्वीच विधान परिषदेत बोलत असताना, माझा छत्रपती संभाजी महाराजांप्रमाणेच छळ झाला होता, असा दावा केला होता. "पक्ष बदलण्यासाठी माझा छळ झाला. पण जसे छत्रपती संभाजी महाराजांनी धर्म बदलला नाही, तसा मी पक्ष बदलला नाही", असे ते म्हणाले होते. याचा संदर्भ देत एकनाथ शिंदे म्हणाले, “तुमचा काय छळ झाला होता? तुमच्यावर कारवाई झाल्यानंतर तुम्हीही लोटांगण घातले होते, हे मला माहीत आहे. पण प्रकरणातून सुटका झाल्यानंतर तुम्ही तुमच्या नेत्यांप्रमाणेच पलटी मारली”, असा चिमटाही शिंदे यांनी काढला.

एकनाथ शिंदे म्हणाले, “छत्रपती संभाजी महाराजांना औरंगजेबाने हाल हाल करून मारले. त्यांचे डोळे काढले, जीभ हासडली, कातडी सोलली, त्यावर मिठ चोळले. अशाप्रकारचे अत्याचार तुमच्यावर (विरोधक) झाले का? तुम्ही सत्तेसाठी लाचारी पत्करली. मुख्यमंत्रीपदाच्या खुर्चीसाठी युती तोडली. महाविकास आघाडीचे सरकार असताना भाजपच्या चार नेत्यांना तुरुंगात टाकून त्यांचे आमदार फोडण्याचा तुमचा कट होता. पण मी युतीधर्मासाठी आणि हिंदूहृदयसम्राट बाळासाहेब ठाकरे यांच्या विचारांसाठी तुमचा 'टांगा पलटी' केला”, असे शिंदे म्हणाले.