प्रसिध्द गायक हनी सिंगने गायलेल 'हे' मराठी गाणं एकलतं का? त्याच्या 'या' वक्तव्याचा सोशल मिडीयावर व्हिडीओ तुफान व्हायरल!

 

 

 

 

 

 

मुंबई : बॉलिवूडमधील प्रसिद्ध रॅपर आणि गायक हनी सिंग नेहमीच आपल्या अनोख्या स्टाइल आणि दमदार गाण्यांसाठी ओळखला जातो. त्याच्या गाण्यांना प्रचंड लोकप्रियता लाभली असून, त्याचा चाहता वर्ग संपूर्ण देशभर पसरलेला आहे. मात्र, सध्या हनी सिंग एका वेगळ्याच कारणामुळे चर्चेत आहे. नुकताच त्याचा एक व्हिडीओ सोशल मीडियावर जोरदार व्हायरल होत आहे, ज्यामध्ये तो मराठीत संवाद साधताना आणि मराठी गाणं गाताना दिसत आहे!

 

 

हनी सिंगचा पुण्यात नुकताच एक जबरदस्त कॉन्सर्ट पार पडला. या कार्यक्रमाला मोठ्या प्रमाणावर प्रेक्षक उपस्थित होते. मात्र, या कॉन्सर्टमध्ये हनी सिंगने मराठीत संवाद साधत सर्वांचे लक्ष वेधून घेतले. स्टेजवरून त्याने प्रेक्षकांशी मराठीत बोलण्याचा प्रयत्न केला आणि त्याच्या या अंदाजाने चाहत्यांना मोठी सरप्राईज मिळाली.

 

 

यात आणखी मजेशीर बाब म्हणजे, हनी सिंगने थेट मराठी चित्रपटसृष्टीतील दिग्गज अभिनेते दादा कोंडके यांच्या प्रसिद्ध गाण्याच्या दोन ओळी गायल्या! "ढगाला लागली कळ" हे गाणं हनी सिंगच्या तोंडून ऐकून उपस्थित श्रोते भारावून गेले. त्याच्या या परफॉर्मन्सला चाहत्यांनी मोठ्या प्रमाणावर दाद दिली आणि टाळ्यांच्या गजरात संपूर्ण सभागृह दणाणून गेलं.

 

 

 

या खास क्षणाचा व्हिडीओ अनेकांनी सोशल मीडियावर शेअर केला आणि त्यावर कमेंट्सचा अक्षरशः पाऊस पडला. काहींनी "हनी सिंग आता मराठी गाणी गाणार का?" असा सवाल केला, तर काहींनी त्याच्या मराठी संवादावर कौतुकाचा वर्षाव केला. "हनी दादाला पुण्याची मिसळ खायला घाला!", "मराठी तर बोलावंच लागेल, पुण्यात आलायस!", "हण्या भावाला कोल्हापुरी तांबडा-पांढरा रस्सा देणार!" अशा मजेशीर कमेंट्स चाहत्यांकडून येऊ लागल्या.

 

 

हनी सिंगने बॉलिवूडमध्ये आपल्या हटके स्टाइलच्या रॅप गाण्यांनी वेगळी ओळख निर्माण केली आहे. ब्राउन रंग, लक २८ कुडी दा, मैं शराबी यांसारखी गाणी सुपरहिट झाली. काही काळ तो डिप्रेशनमधून गेला, मात्र पुन्हा त्याने आपल्या करिअरला नवे वळण दिले. आज त्याचा चाहता वर्ग भारतातच नव्हे, तर जगभरात आहे.

 

 

 

हनी सिंगने कार्यक्रमादरम्यान सांगितलं की, "मला अनेक भाषा येतात आणि त्यामागचं कारण म्हणजे मी भारतावर प्रेम करतो!" त्याच्या या वक्तव्याने चाहत्यांच्या मनात त्याच्याबद्दलचा आदर वाढला. सध्या हा व्हिडीओ प्रचंड व्हायरल झाला असून २ मिलियनहून अधिक लोकांनी तो पाहिला आहे. हनी सिंगचे मराठी प्रेम पाहून चाहते खूश झाले असून, आता त्याच्याकडून एखादं संपूर्ण मराठी गाणं ऐकायला मिळेल का, याची उत्सुकता लागून राहिली आहे!