महाबळेश्वरमध्ये 'क्रिकेट फ्रॉग'ची नवी प्रजात; पार्किंगमध्ये साठलेल्या पाण्यात सापडला बेडूक

 

 

नव्याने शोध लागलेला बेडूक महाबळेश्वरमधील कोळी आळीमधील एका खाजगी वाहनतळामध्ये साठलेल्या पाण्याच्या शेजारी आढळून आला. उत्तर पश्चिमी घाटातील आढळक्षेत्रावरुन या प्रजातीचे नामकरण 'घाटी' या संस्कृत आणि 'बोरियालिस' या उत्तरेकडील क्षेत्र दर्शवणार्‍या लॅटीन शब्दांवरुन करण्यात आले. आकाराने ५.५ सेमीपेक्षा मोठे असणार्‍या या प्रजातीचा प्रजनन काळ हा पावसाळ्याच्या सुरुवातीच्या दिवसांपुरता मर्यादित असतो. मोठा आकार, आवाजामधील वेगळेपण आणि वैशिष्ट्यपूर्ण जनुकीय संचावरुन ही प्रजाती त्याच्या कुळातील इतर प्रजातींपासून वेगळी ठरते. ही प्रजाती निशाचर असून छोटे किटक हे तिचे मुख्य खाद्य आहे. हा शोध केवळ नवीन प्रजातीच्या यादीत एक नवीन नाव जोडण्यासाठी नसून पश्चिम घाटाच्या जैवविविधतेच्या हॉटस्पॉटमध्ये चालू असलेल्या संरक्षण प्रयत्नांची गरज अधोरेखित करण्यासाठी आहे.