बदलापूर प्रकरणात काय घडलं? A to Z माहिती...

मुंबई : “बदलापूर अत्याचार घटनेतील आरोपी अक्षय शिंदे याने पोलिसांवर गोळीबार केला. त्यामुळे पोलिसांनी स्वसंरक्षणार्थ त्याच्यावर गोळी झाडली. यामध्ये या आरोपीचा मृत्यू झाला,” अशी माहिती राज्याचे उपमुख्यमंत्री तथा गृहमंत्री देवेंद्र फडणवीस यांनी सोमवार, दि. २३ सप्टेंबर रोजी दिली.

अक्षयच्या पहिल्या पत्नीने दाखल केलेल्या गुन्ह्याच्या संदर्भात चौकशीसाठी बदलापूर पोलीस अक्षयचा ट्रान्झिट रिमांड घेण्यासाठी तळोजा कारागृहात गेले होते. तळोजा कारागृहातून आरोपी अक्षयला घेऊन सायंकाळी ६:३० वाजण्याच्या सुमारास पोलीस पथक मुंब्रा बायपासजवळ पोहोचले. यावेळी, शिंदे याने एका हवालदाराची बंदूक हिसकावून गोळीबार केला. यात साहाय्यक पोलीस निरीक्षक निलेश मोरे यांच्या पायाला गोळी लागली. दरम्यान, स्वसंरक्षणार्थ, दुसर्‍या पोलीस अधिकार्‍याने त्याच्यावर गोळी झाडली, ज्यामुळे तो गंभीर जखमी झाला. कळवा येथील छत्रपती शिवाजी महाराज रुग्णालयात नेले असता, त्यांचा मृत्यू झाला. तर, जखमी साहाय्यक पोलीस निरीक्षक नीलेश मोरे यांच्यावर ठाण्याच्या ज्युपिटर रुग्णालयात उपचारासाठी दाखल करण्यात आले आहे, अशी माहिती सूत्रांनी दिली. मुख्यमंत्री एकनाथ शिंदे यांनीही याबाबत माहिती दिली. ते म्हणाले की, “अक्षय शिंदे हा आरोपी बदलापूरमधील लहान मुलीवर अत्याचार प्रकरणात कोठडीत होता. या आरोपीच्या पत्नीनेही या आरोपीवर लैंगिक अत्याचाराचे आरोप केले होते. आरोपीला तपासादरम्यान बाहेर आणल्यावर या आरोपीने एपीआय निलेश मोरे यांच्यावर गोळी झाडली. यामध्ये हे पोलीस अधिकारी जखमी झाले. अशावेळी पोलिसांनी बचावासाठी या आरोपीवर गोळ्या झाडल्या. निलेश मोरेंवरदेखील उपचार सुरू आहेत,” असे शिंदे म्हणाले.

बदलापूरमधील लहान मुलींवर झालेल्या अत्याचार प्रकरणातील आरोपी अक्षय शिंदे याने पोलिसांची बंदूक खेचून त्यांच्यावरच गोळीबार करण्याचा प्रयत्न केला. यावर पोलिसांनी स्वसंरक्षणार्थ प्रतिहल्ला केला. त्यात त्याचा मृत्यू झाला, हे छान झाले. पोलिसांनी सर्वतोपरी प्रयत्न करून स्वसंरक्षणार्थ गोळीबार केला. त्याचा अंत झाला. यात आपण पोलिसांच्या मागे ठामपणे उभे राहिले पाहिजे.

अशा प्रकारच्या गुन्हेगाराला इतक्या चांगल्याप्रकारे मरण यायला नको होते. चौकात उभे करुन येणार्‍या-जाणार्‍याकडून हाल करून जीव जाईपर्यंत सर्वांसमक्ष तडफडत तो मरायला हवा होता. तरच अशा मनोवृत्तीला जबरदस्त भीती वाटेल. पण एकाअर्थी या घटनेमुळे या केसमुळे वकिलांवर तसेच त्याच्यावरील तुरुंगात होणारा खर्च वाचला म्हणायचा.

बदलापूर अत्याचार प्रकरणातील आरोपी अक्षय शिंदे याच्यावर पोलिसांनी स्वसंरक्षणार्थ हल्ला करून त्याला जागीच ठार केले. यात गैर काहीच नाही. या घटनेला राजकीय वळण देणार्‍यांनी आपली सदसद्विवेक बुद्घी वापरून बेताल वक्तव्ये टाळावी. आरोपीच्या अशा मृत्युमुळे त्या चिमुरडीला जलद न्याय मिळाला, असे म्हणणे वावगे ठरणार नाही.