पप्पू की पापी?

 

 

खलीस्तानी, काश्मीरच्या दहशतवाद्यांना समर्थन करणार्‍या आणि भारताचे तुकडे पडावे, यासाठी काम करणार्‍या इल्हान उमर या अमेरिकेच्या महिला खासदाराला राहुल गांधी अमेरिकेत भेटले. ‘नवरा मेला तरी चालेल, पण सवत विधवा झाली पाहिजे’ एक अशी म्हण आहे. दुसरी म्हण आहे, ‘नाक कापून दुसर्‍याला अपशकून करणे.’ तर सध्या राहुल गांधी नावाच्या सत्तापिपासु व्यक्तीची परदेशात अशीच कारस्थाने सुरू आहेत. राहुल गांधी संसदेत महिलांना ‘फ्लाईंग किस’ देतात. राहुल गांधी हिंदूंच्या भगव्या रंगाच्या आस्थेला ‘भगवा आतंकवाद’ म्हणतात किंवा राहुल गांधी ‘मंंदिरात हिंदू लोक मुलींना छेडायला जातात,’ असे म्हणून सातत्याने हिंदूंचा अपमान करत आले आहेत. ज्या ज्या गोष्टींनी देश मजबूत हेाईल, त्या त्या गोष्टींना राहुल गांधी यांचा विरोध. मग तो ‘सीएए’ कायदा असू दे, की ‘समान नागरी कायदा’ असू दे, की ‘३७० कलम’ हटवण्याची ऐतिहासिक घटना असू दे, राहुल गांधींनी सगळ्यांना विरोध केला. उरल्या-सुरल्या मतदारांनाही चिथावले. देशातल्या तरुणांनी सशस्त्र आंदोलन करावे, यासाठीही वाटेल ते बोलत राहिले. जिथे कुठे हिंदूंमधील दोन जातींमध्ये काही वितुष्ट किंवा काही अप्रिय घटना घडली, तिथे तिथे ते आगीत तेल ओतण्यासाठीही गेले. तर ही राहुल यांची कारकीर्द आणि ही त्यांची देशसेवा! देशातील जनतेने त्यांच्या या सगळ्या बेताल वर्तनाला गांभीर्याने घेतले नाही. कारण, कालपर्यंत ते देशातल्या देशात हे सगळे उपद्व्याप करत होते. मात्र, आज ते परेदशात अमेरिकेत जाऊन भारताविरोधी विषारी फुत्कार काढत आहेत आणि भारताविरोधी लोकांनाही भेटत आहेत. ते अमेरिकेमध्ये इल्हान उमर या अमेरिकेच्या खासदार महिलेस भेटले. इल्हान अमेरिकेतील पहिली आफ्रिकी शरणार्थी मुस्लीम महिला खासदार. इल्हान ही खलिस्तानवाद्यांचे, काश्मीरच्या फुटीरतावाद्यांचेही समर्थन करते. अमेरिकेच्या एका अहवालात म्हटले आहे की, २०२२ साली इल्हान पाकव्याप्त काश्मीरमध्ये गेली. त्याचे पूर्ण फण्डिंग पाकिस्तानने केले होते. त्यानंतर इल्हानने सातत्याने भारताचे तुकडे पडावे, यासाठी समर्थन केले. राहुल यांचे मोदींसोबत सत्तेसंदर्भात वैयक्तिक हेवेदावे असतील, पण त्यासाठी थेट देशविघातक शक्तींशी हातमिळवणी करावी? लोक बुद्धीची मर्यादा पाहून त्यांना ‘पप्पू’ म्हणतात. पण, असली काही कृत्ये पाहिली की वाटते, हा पप्पू की पापी?