पंतप्रधान नरेंद्र मोदी रशिया दौऱ्यावर रवाना; पुतीन यांच्यासोबत ‘या’ मुद्द्यांवर होणार चर्चा

 

 

नवी दिल्ली : पंतप्रधान नरेंद्र मोदी ३ दिवसांच्या (८-१० जुलै) विदेश दौऱ्यावर रवाना झाले आहेत. या तीन दिवसांत ते रशिया आणि ऑस्ट्रियाला भेट देणार आहेत. तिसऱ्यांदा पंतप्रधानपदाची सूत्रे हाती घेतल्यानंतर मोदींचा हा दुसरा महत्त्वाचा विदेश दौरा आहे. या कार्यकाळातील हा पहिलाच द्विपक्षीय दौरा आहे. या दौऱ्यात पंतप्रधान मोदी रशियाचे अध्यक्ष व्लादिमीर पुतिन यांचीही भेट घेणार आहेत.

 

२०१९ मध्ये पंतप्रधान मोदी रशियाला गेले होते. त्यानंतर कोविड महामारी आणि नंतर युक्रेन-रशिया संघर्षामुळे दोन्ही देशांचे नेते एकमेकांच्या देशाला भेट देऊ शकले नाहीत. युक्रेन युद्धानंतर पंतप्रधान मोदी पहिल्यांदाच रशियाला जात आहेत. दरम्यान, चीनचे राष्ट्राध्यक्ष शी जिनपिंग यांच्याशिवाय पुतिन यांनी अन्य कोणत्याही मोठ्या नेत्याची भेट घेतली नाही.

 

आपल्या दौऱ्यात पंतप्रधान मोदी केवळ राष्ट्राध्यक्ष पुतिन यांचीच भेट घेणार नाहीत तर रशियामध्ये राहणाऱ्या भारतीयांनी आयोजित केलेल्या कार्यक्रमातही सहभागी होणार आहेत. याशिवाय त्यांना रशियाचा सर्वोच्च सन्मान सेंट अँड्र्यू ऑर्डर देण्यात येणार आहे. २०१९ मध्ये त्यांना हा पुरस्कार देण्यात आला होता, आता तो त्यांना प्रदान करण्यात येणार आहे.

 

पंतप्रधान मोदी राष्ट्राध्यक्ष पुतिन यांच्यासोबत भारत आणि रशिया यांच्यातील व्यापार आणि लष्करी सहकार्यावरही चर्चा करतील. भारत रशियाकडून सातत्याने मोठ्या प्रमाणात कच्च्या तेलाची खरेदी करत आहे. त्यामुळे भारताची व्यापारी तूटही वाढत आहे. याबाबतही चर्चा होणार आहे. दोन्ही नेत्यांमधील चर्चेतील मुख्य मुद्दा युक्रेन-रशिया युद्ध असेल. हे युद्ध दोन वर्षांहून अधिक काळ सुरू असून दोन्ही युद्ध करणाऱ्या देशांमध्ये शांततेसाठी कोणतीही चर्चा झालेली नाही. भारताने दोन्ही देशांशी चांगले संबंध ठेवले असून अनेकदा परिस्थिती शांत करण्याचे काम केले आहे.

 

अमेरिकेसह उर्वरित जगाचेही पंतप्रधान मोदींच्या या दौऱ्यावर लक्ष लागून आहे. येथे ते राष्ट्राध्यक्ष पुतिन यांच्यासोबत भारत-रशिया शिखर परिषदेतही सहभागी होतील. दोन्ही देशांमधील राजनैतिक सहकार्याचे हे सर्वात मोठे व्यासपीठ आहे. २०१९ मध्ये पंतप्रधान मोदींनी यात शेवटचा सहभाग घेतला होता. या भेटीबद्दल पंतप्रधान मोदींनी ट्विटरवर लिहिले की, “पुढील तीन दिवसांत मी रशिया आणि ऑस्ट्रियामध्ये असणार आहे. ज्या देशांशी भारताची दीर्घकालीन मैत्री आहे त्यांच्याशी संबंध अधिक दृढ करण्यासाठी ही भेट एक उत्तम संधी असेल. या देशांमध्ये राहणाऱ्या भारतीय समुदायाशी संवाद साधण्यासाठी मी उत्सुक आहे.”

 

रशियानंतर पंतप्रधान मोदी युरोपीय देश ऑस्ट्रियालाही भेट देणार आहेत. ४१ वर्षांतील भारतीय पंतप्रधानांचा हा पहिला ऑस्ट्रिया दौरा असेल. पंतप्रधान मोदी ऑस्ट्रियाचे राष्ट्रपती आणि चांसलर या दोघांचीही भेट घेतील आणि व्हिएन्नामध्ये राहणाऱ्या भारतीय समुदायाशीही संवाद साधतील.