मोदींच्या डिजिटल इंडियाचा करिश्मा!

ठाण्यातील दाभोळकर कुटूंब शनिवारी रिक्षाने विवियाना मॉलमध्ये गेले होते. रिक्षातुन उतरताना महत्त्वाची कागदपत्रे आणि ४० हजार रुपये रोख असलेली त्यांची बॅग रिक्षातील आसनाच्या मागील बाजूस राहिली. बॅग रिक्षात राहिल्याचे लक्षात आल्यानंतर दाभोलकर यांनी वर्तकनगर पोलीस ठाण्यात तक्रार केली.

हे वाचलंत का? - 

    पंतप्रधान मोदी यांची ब्रिटनच्या नव्या पंतप्रधानांसोबत चर्चा!

वर्तकनगर पोलीस स्टेशनच्या महिला पोलीस उपनिरीक्षक शिंदे, बोरसे, गायकवाड आणि सातपुते यांनी विवियाना मॉल परिसरातील सी.सी टिव्ही कॅमेरे तपासले, परंतु ती रिक्षा आढळून आली नाही. दरम्यान दाभोळकर यांनी त्या रिक्षा चालकाला मोबाईलवरून रिक्षा भाडे 'G Pay' केल्याने रिक्षा चालकाचा मोबाईल नंबर मिळाला. त्याच्या मोबाईल नंबरवर पोलिसांनी कॉल करण्याचा प्रयत्न केला, परंतु तो संपर्क टाळत होता. दाभोळकर यांनीही वारंवार फोन केले तसेच मेसेजही केले.

अखेर रिक्षाचालकाच्या पत्नीने फोन करून आम्हाला बॅग सापडलीच नाही, आम्हाला त्रास देऊ नका, असा आव आणला. अखेर, दाभोळकर यांनी पोलिसांची भीती दाखवल्यानंतर बॅग असल्याची कबुली दिली. रिक्षाचालकाने रविवारी रात्री ती बॅग वर्तकनगर पोलिसांच्या ताब्यात दिली. कागदपत्रे आणि रोख रकमेसह बॅग मिळाल्याने दाभोळकर कुटुंबाने पोलिसांचे आभार मानले.