मुंबई : कांदिवली पूर्व मतदारसंघातील आमदार अतुल भातखळकर यांची भाजपच्या माध्यम विभागाच्या केंद्रीय समन्वयकपदी नियुक्ती करण्यात आली आहे. प्रदेशाध्यक्ष चंद्रशेखर बावनकुळे यांनी मंगळवार, दि. 23 जुलै रोजी याबाबत माहिती दिली. नुकत्याच पुण्यात झालेल्या भाजपच्या अधिवेशनात उपमुख्यमंत्री देवेंद्र फडणवीस यांनी आपल्या कार्यकर्त्यांना संबोधित करताना “सडेतोड भूमिका व्यक्त करा, विरोधकांना ठोकून काढा,” अशी परवानगी दिली. त्या पार्श्वभूमीवर, परखड मते मांडणार्या आ. भातखळकर यांची निवड महत्त्वाची मानली जात आहे. बावनकुळे यांनी मंगळवारी नियुक्तीचे पत्र आ. भातखळकर यांना दिले. तसेच त्यांचे अभिनंदनही केले.