मोदींची भीती आणि जग

थोडक्यात, चीनला समाधान आहे की, आता भाजप आणि मोदींकडे संपूर्ण बहुमत नाही. सत्तास्थापनेसाठी इतर पक्षांची सोबत घ्यावी लागणार आहे. त्यामुळे मोदी चीनच्या कटकारस्थानाला पूर्वीइतके उत्तर देऊ शकणार नाहीत. तसेच भारताला चीनच्या बरोबरीची आर्थिक महासत्ता बनवू शकणार नाहीत. चिनी माध्यमांनीही भाजपने एकट्याच्या बळावर बहुमत मिळवले नाही, याबाबत आनंदच व्यक्त केला आहे. दुसरीकडे भिकेच्या पंथाला लागलेले पाकिस्तानचे राजकीय नेते म्हणत आहेत, ”बरे झाले, भाजपला बहुमत मिळाले नाही. आता आम्हाला राहुल गांधींना पंतप्रधान बघायची इच्छा आहे. कारण, मोदींच्या नेतृत्वामध्ये भारतातील बहुसंख्यावाद जागा झाला होता. हे भारताच्या शेजारी राष्ट्रांसाठी चांगले नव्हते. या अशा परिस्थितीमध्ये राहुल काय अगदी अरविंद केजरीवाल किंवा ममता बॅनर्जी जरी पंतप्रधान बनणार असेल, तर आम्ही त्यांना सहकार्य करू.” आता इथे पाकिस्तानी नेत्यांची लायकी काय बोलता काय, हा डायलॉग लागू होतो. पण, पाकिस्तानी नेत्यांना नरेंद्र मोदींची केंद्रातील भाजप सरकारची इतकी भीती आहे का?

तर याचे कारण पाकिस्तानचा विचारवंत अभ्यासक प्रो. डॉ. मुजीब अफजलच्या विधानात दिसते. ते एका मुलाखतीमध्ये म्हणाले होते की, ”९०च्या दशकात कोणी विचारही केला नसता की, हिंदुस्थानात कुणी तरी एक माणूस येईल आणि तो हिंदुत्व इतक्या सहजपणे देशात पुन्हा सर्वमान्य करेल.” तर पाकिस्तानला हे पचनीच पडत नाही की, पूर्वी पाकिस्तान भारतामध्ये सहज दहशतवादी कृत्ये करायचा, त्यांच्या त्या संस्कृतीचा प्रचार-प्रसारही भारतात सुखनैव करायचा. मात्र, मोदी पंतप्रधान झाल्यानंतर पाकिस्तानचे आर्थिक, राजकीय कंबरडेच मोडले. याचे दुःख पाकिस्तानला होतेच. पण, १९६१ किंवा १९६५ सारखे भारतावर हल्ला करण्याची ताकद पाकिस्तानमध्ये २०१४ नंतरच्या नव्या भारताने ठेवलीच नाही. आता मोदी पुन्हा सत्तेत येतील आणि भारताला आणखीन सुस्थिर करतील, ही भीती पाकिस्तानला सतावते. सन २०४७ पर्यंत भारत मुस्लीम राष्ट्र बनावे, यासाठी जंगजंग पछाडणार्‍यांना २०४७ सालापर्यंत भारत जगद्गुरू बनावा, असे स्वप्न पाहणारे नरेंद्र मोदी खटकणारच. पाकिस्तान हा त्यातलाच एक भाग. या निवडणुकीच्या जय-पराभवाचे विश्लेषण करताना जगभरातल्या प्रसार-प्रचार माध्यमांनी जी मते मांडली, त्यामध्ये मोदी आणि भारतीय जनता पार्टी यांना ‘हिंदू राष्ट्रवादी नेता’ आणि ‘हिंदू राष्ट्रवादी पार्टी’ असेच संबोधले आहे. उदाहरणार्थ, अमेरिकेच्या ‘वॉल स्ट्रीट जर्नल’ने लिहिले की, अपेक्षेप्रमाणे मोदींना परिणाम प्राप्त झाले नाहीत. त्यांच्या हिंदू राष्ट्रवादी पार्टीला विरोधी पक्षाने जोरदार झटका दिला.