आता डीपफेक व्हिडिओ ओळखणे होणार सोप्पे! निवडणुकीच्या तोंडावर ओपन ए आय कंपनीची नवी योजना!

 

 

मुंबई: निवडणुकीच्या धामधुमीत खोटे व्हिडिओ खोटे फोटो वायरल होण्याची शक्यता असते. अशातच काही प्रकरणे यापूर्वीही अनेकदा समोर आल्याने ओपन ए आय (Open AI) कंपनीने युएस स्थित कंटेंट प्रोव्हिंस अँड ऑथेन्टिसिटी कमिटीशी हातमिळवणी केली आहे. आगामी काळातील 'डिपफेक' व्हिडिओ रोखण्यासाठी कंपनीने ही नवी खबरदारी घेण्याचे ठरवले आहे. ओपन ए आय ही चाट जीपीटी बनवणारी मातृसंस्था आहे. याशिवाय भारतातही मोठे पाऊल उचलत कंपनीने भारतीय निवडणूक आयोगाशी हातमिळवणी देखील केली आहे.

 

भारतातील आगामी काळातील सोशल मीडियावरील बनावट कंटेट ओळखण्यासाठी कंपनीची प्रणाली विशेष काम करणार आहे. यापूर्वी निवडणूक आयोगाने राजकीय पक्षांना डीपफेक व्हिडिओ बाबत सावधानतेचा इशारा दिला होता. कुठल्याही राजकीय पक्षांकडून या बनावट कंटेंट अथवा डीपफेक व्हिडिओ येणार नाही याची काळजी घेण्यासाठी पक्षांना निवडणूक आयोगाने ताकीद दिली होती. भारतीय तंत्रज्ञान कायदा २००० अंतर्गत ६६ सी, ६६ डी, कलम १२३ (४) व १७१ जी, ४६५,४६९,५०५ अंतर्गत डीपफेक व्हिडिओ तयार करण्यात येणारा व्यक्तीवर फौजदारी कारवाई करण्यात येऊ शकते.

 

जागतिक पातळीवरील डीपफेक व्हिडिओ ओळखण्यासाठी गेले काही दिवस अडचण येत होती तसेच या वाढलेल्या चिंतेने २० हून अधिक तंत्रज्ञान कंपन्यांनी एकत्र येत बनावट कंटेंट ओळखण्यासाठी उपाययोजना करण्याचे ठरवले आहे.

 

हीच गरज ओळखत ओपन ए आय कंपनीने DALl E 3 नावाचे टूल बनवले आहे ज्यामध्ये कंटेटची पडताळणी करणे शक्य होणार आहे. याशिवाय मायक्रोसॉफ्ट कंपनीची मदत घेत ओपन ए आय ' Societal Resilience ' निधी तयार करणार असुन एआय बद्दल जागरुकता करण्यासाठी याचा वापर केला जाईल. चाटजीपीटी निर्मात्याने डिजिटल सामग्री जसे की फोटो किंवा ऑडिओ अशा सिग्नलसह चिन्हांकित करण्यासाठी छेडछाड-प्रतिरोधक वॉटरमार्किंग जोडण्याची योजना आखली आहे जी काढणे कठीण होणार आहे.