‘हिंदुफोबिक’ कॅलिफोर्निया

 

 

एका ब्रिटिश संस्थेने आपल्या एका अभ्यास अहवालात दिलेल्या माहितीनुसार, शाळांमधील गोरी मुले हिंदू समाजातील मुलांना धमकवितात आणि त्यांच्या धर्माबद्दल चुकीची टिप्पणी करतात. हे खूप संतापजनक आहे. या अहवालात काही घटनांची उदाहरणे देऊन हिंदुंप्रती द्वेषाची समस्या लक्ष्यकेंद्रित करण्यात आली आहे, जसे की हिंदू मुलांना इस्लाम धर्म स्वीकारण्यास सांगून त्रास देणे किंवा त्यांच्यावर मांसाहार फेकणे. अहवाल तयार करताना काही पालकांसोबत चर्चा करण्यात आली होती. सर्वेक्षणात सहभागी झालेल्या ५१ टक्के पालकांनी सांगितले की, “त्यांच्या मुलांना शाळेत हिंदुंविरोधी द्वेषाचा अनुभव आला आहे.” गेल्या पाच वर्षांत अशा घटनांची नोंद होण्याचे प्रमाण नगण्य आहे, ही चिंतेची बाब आहे. वास्तविक एक टक्क्यापेक्षा कमी प्रकरणांमध्ये, मुलाने किंवा पालकांनी गुंडगिरीबद्दल माहिती दिली किंवा तक्रार नोंदविली आहे. सर्वेक्षणात सहभागी झालेल्या १९ टक्के पालकांचा असा विश्वास आहे की, शाळा हिंदुंविरोधी द्वेष ओळखू शकतात. अशा घटनांकडे शाळा लक्ष देतात, असे केवळ १५ टक्के लोकांचे मत होते. एकूणच हिंदुंविरोधात द्वेषपूर्ण गुन्ह्यांमध्ये लक्षणीय वाढ झाली असून, हिंदुंच्या आस्थेवर अमेरिकेत घाला घातला जात आहे का? असा प्रश्न उद्भवत आहे. अहवाल पाहता हिंदुंच्या सुरक्षेची हमी अमेरिका निश्चितच देईल, अशी आशा आहे.