देश हमे देता हैं सब कुछ...

हिंदुकूश हे ‘क्लास वन मरिन इंजिनियर ऑफिसर’ आहेत. त्यांनी जगातील सर्वच खंडांना आणि जवळजवळ ५३ देशांना भेटी दिल्या. जगभर फिरल्याने जागतिक संस्कृती त्यांना अनुभवता आली. या पार्श्वभूमीवर त्यांना विश्वाचे मंगल इच्छिणार्‍या भारतीय धर्मसंस्कृतीचे श्रेष्ठत्व सातत्याने जाणवले. वर्षाचे आठ महिने जहाजावर असताना जहाजामध्येही जगभरातील लोकांशी संपर्क होत असतो. या सगळ्या प्रवासात भारताचा वैभवशाली इतिहास आणि संस्कृती, भयंकर प्रतिकूल परिस्थितीमध्येही धर्म जपत काळाच्या छाताडावर पाय रोवून उभा राहिलेला भारतीय हिंदू, ही हिंदुकूश यांच्यासाठी अभिमानाची बाब. हे सगळे संपूर्ण जाणून घेऊन ते समाजासमोर व्यापक स्वरुपात यायलाच हवे, असे हिंदुकूश यांना वाटत असे. त्यांनी १९९० साली ‘संस्कारधारा : वेदमंत्रों से वंदे मातरम्’ ही ऑडिओ कॅसेट तयार केली. वेदमंत्र, त्यांचे अर्थ, त्यांचे कालातीत महत्त्व ते ‘वंदे मातरम्’ या राष्ट्रीय गीताच्या मागील इतिहास, संघर्ष, यश आणि देशाचे उज्ज्वल भवितव्य हे सगळे यामध्ये होते.

९०च्या दशकात मर्चंट नेव्हीमध्ये इंजिनिअर असलेल्या तरुणाने ‘वेदमंत्र ते वंदे मातरम्’ समाजासमोर मांडावे, हे सोपे नव्हते. या कॅसेटला जगामध्ये उत्तम प्रतिसाद लाभला. त्यांना वेदमंत्रांबद्दल अभ्यास करावासा का वाटला, तर हिंदुकूश हे स्वामी समर्थांचे भक्त. मठामध्ये त्यांची भेट स्वामी भक्त गुरूदेव खंडोज आप्पाजी मोरे म्हणेजेच मोरे गुरूजींशी झाली. मोरे गुरूजी हिंदुकूश यांच्याशी चर्चा करताना वेद, सूक्त यांवर माहितीपूर्ण भाष्य करत. त्यामुळेच हिंदुकूश यांना वेदांबद्दल उत्सुकता निर्माण झाली. त्याचे दृश्य स्वरुप म्हणजे ‘संस्कारधारा : वेदमंत्रों से वंदे मातरम्.’ उत्तम संगीतकार असलेले हिंदुकूश यांनी काही तथाकथित संगीत शिक्षण घेतलेले नाही.