पंतप्रधानांच्या ‘विकसित भारत’ संकल्पनेतील शाश्वत विकास हाच मास्टर प्लॅन : हेमंत सवरा

 

पालघर लोकसभा मतदारसंघ सागरी, डोंगरी आणि नागरी या तीन विभागांत मोडतो. त्यामुळे विस्तीर्ण असा सागरी किनारा, डोंगराळ भाग आणि नागरी भाग येथे आहे. म्हणूनच वसईपासून डहाणूपर्यंत हा मतदारसंघ पसरलेला आहे. तरीही, या भागात भाजपची संघटनात्मक बांधणी चांगली आहे. येथील संघटनात्मक बांधणी दोन ते तीन वर्षांपूर्वीच सुरू झाली होती. त्यामुळे, उमेदवारी उशीरा जाहिर झाली असली, तरी दीड महिन्यापूर्वीच पालघरचे पालकमंत्री रवींद्र चव्हाण यांनी राजकीय परिस्थितीमुळे उमेदवारी उशीरा जाहीर होऊ शकते, असे सांगून प्रचार थांबायला नको, असे सांगितले होते. त्यानुसार तालुकास्तरावर, जिल्हास्तरावर बैठका सुरू झाल्या होत्या. यामुळे, फक्त उमेदवाराचे नाव जाहीर होणे बाकी होते, पण प्रचाराची कामे आधीच सुरू झाली होती. सोमवार, दि. १३ मे रोजी केंद्रीय गृहमंत्री अमित शाह, प्रदेशाध्यक्ष चंद्रशेखर बावनकुळे, मुख्यमंत्री एकनाथ शिंदे, उपमुख्यमंत्री देवेंद्र फडणवीस पालघर लोकसभेच्या प्रचारासाठी येऊन गेले. यासोबत शनिवार, दि.१८ मे रोजी उत्तर प्रदेशचे मुख्यमंत्री योगी आदित्यनाथदेखील प्रचारात सामील होतील. याव्यतिरिक्त कौशल्यविकासमंत्री मंगलप्रभात लोढा, आ. संजय केळकर, आ. नितेश राणे हेदेखील पालघर लोकसभेच्या प्रचारासाठी येऊन गेले.

 

पंतप्रधान नरेंद्र मोदींनी विकासाची गॅरेंटी दिलेली आहे. त्यांनी गेल्या दहा वर्षांत केलेली कामे पाहता, त्यांना विजयाचा आत्मविश्वास आहेच. परंतु, सर्वसामान्य जनतेमध्ये विश्वास वाढविला आहे. या आत्मविश्वासाच्या जोरावरच त्यांनी पुढच्या २५ वर्षांच्या विकासाचा आराखडा तयार केलेला आहे. म्हणून, त्यांनी २०४७ पर्यंत ‘विकसित भारता’ची संकल्पना मांडलेली आहे. जी शाश्वत विकासासाठी प्रयत्न करत आहे. त्यामुळे ही संकल्पना सर्व घटक पक्षांसोबत राबविताना निश्चित आनंद होईल.