‘पार्टनर इन करिअर’चीव्याख्या जपणारा उमेश कामत

 

उमेश कामत आणि प्रिया बापट ही मनोरंजनसृष्टीत गेल्या कित्येक वर्षांपासून कार्यरत एक लोकप्रिय जोडपे. तेव्हा, एकाच क्षेत्रात असण्याचे फायदे तसे तोटेही आहेतच. त्याविषयी बोलताना उमेश सांगतो की, “आमचं जेव्हा लग्न ठरत होतं, तेव्हा प्रिया ज्या मालिकेत काम करत होती, त्या दिग्दर्शकांना आमच्या नात्याबद्दल समजले. आम्ही लग्न करणार आहोत, हेदेखील त्यांना माहीत होते. त्यावेळी ते दिग्दर्शक असे म्हणाले होते की, बघा हा तुमचा अभिमान होता कामा नये. कारण, एकाच क्षेत्रात काम करत असताना तुमची प्रगती लोकांच्या डोळ्यात खुपत असते. त्यामुळे मग ‘ट्रोल’ करणे किंवा काड्या टाकणे या गोष्टी होतच असतात. मात्र, आम्ही याकडे लक्ष न देता आमच्या करिअरच्या वाटा निवडून, त्यावर चालत सुटलो. सुदैवाने प्रिया हिंदीतही उत्तम भूमिका करत आहे आणि माझा कधीही हिंदीतचं काम करावे किंवा हिंदीतच जावे, असा अजिबात अट्टहास नव्हता. त्याचे कारण असे की, माझे ध्येय हे फार वेगळे आहे. महत्त्वाचे म्हणजे, हिंदी किंवा कोणतीही ठरावीक भाषाच वरचढ राहिली नसून, प्रत्येक भाषेतील कलाकृती ही हिरो झाली आहे.

 मराठी, बंगाली, गुजराती किंवा अन्य कोणत्याही भाषेतील मनोरंजनसृष्टी मोठी होत आहे याचा नक्कीच कलाकार म्हणून आनंद आहे. पण, मुळात हिंदीत काम करण्याची फारशी खुमखुमी नसल्यामुळे आम्ही दोघेही कलाकार असलो तरी आमच्यात कधी स्पर्धा किंवा हेवेदावे नव्हतेच.” प्रिया सध्या हिंदी वेबसीरीज आणि चित्रपटात काम करताना तर दिसतेच, पण रंगभूमीवर तिचं ‘जर तरची गोष्ट’ हे नाटकही गाजत आहे. त्यामुळे तिच्या आणि स्वत:च्या कार्यशैलीबद्दल बोलताना उमेश म्हणाला की, “आम्ही दोघेही रंगभूमी, मालिका या माध्यमांतूनच चित्रपटांपर्यंत पोहोचलो आहोत. माझ्या प्रत्येक कामाकडे आणि त्या भूमिकेकडे पाहण्याचा दृष्टिकोन निराळा आहे आणि प्रियाची काम करण्याची पद्धत जराही विश्रांती न घेता करण्याची आहे. त्यामुळे तिला पाहून मला खरं तर ऊर्जा आणि उमेद मिळते. तिच्या याच कामाप्रतीच्या समर्पणाचे मला कौतुक आणि अभिमान नक्कीच आहे.”नवरा म्हणून प्रियाचा आदर आणि अभिमान आहे असे म्हणत उमेश म्हणतो की, “प्रियाच्या बाबतीत एक सांगेन की, ती कोणतीही कलाकृती स्वीकारताना फार विचार करून निवडते. तिच्या मनासारखी जर का ती गोष्ट झाली नाही किंवा तिला वाटत असेल की, ती साध्य होणार नाही, तर पदरी दुसरं काम नसेल तरी समोर आलेले कामदेखील नाकारण्याची तिच्यात हिंमत आहे. कारण, मनोरंजन क्षेत्र हे फार चलबिचल आहे.