भास्कर जाधव ठाकरेंना ‘नकोसे’

 

 

ताकद नसताना, केवळ हट्टापायी उद्धव ठाकरे आणि शरद पवारांनी लोकसभा निवडणुकीत काँग्रेसच्या पारंपरिक मतदारसंघांवरही दावा ठोकला. त्यामुळे स्थानिक नेते आणि कार्यकर्ते नाराज झाले खरे; मात्र हायकमांडच्या आदेशापुढे बोलणार कोण? सांगली लोकसभा मतदारसंघातही हीच स्थिती. कोल्हापूरची जागा काँग्रेसला गेल्यामुळे ठाकरेंनी सांगलीत परस्पर उमेदवार जाहीर केला आणि वादाची ठिणगी पडली. माजी मुख्यमंत्री वसंतदादा पाटील यांचे नातू विशाल पाटील येथून तयारीत होते. पण, मविआची अधिकृत उमेदवारी चंद्रहार पाटलांच्या गळ्यात पडल्याने ते नाराज झाले. स्थानिक आमदार विश्वजित कदम यांच्यासह अन्य नेत्यांनी विशाल पाटलांच्या तिकिटासाठी शर्थीचे प्रयत्न केले, इतर मतदारसंघात असहकार्याचा इशारा दिला, बंडखोरीची धमकीही दिली. त्यामुळे तिढा हायकमांडच्या दारी गेला, पण शेवटपर्यंत तोडगा काही निघाला नाही. त्यामुळे त्यांनी अपक्ष अर्ज दाखल केला. अशावेळी पक्षाची इभ्रत चव्हाट्यावर येऊ नये आणि अन्य मतदारसंघांत ठाकरेंच्या रोषाचा फटका बसू नये, यासाठी प्रदेशाध्यक्ष नाना पटोले यांनी विशाल पाटील यांच्यावर कारवाईचा इशारा दिला. त्याचवेळी पक्षातील ज्येष्ठ नेते बाळासाहेब थोरात यांनी, ‘काही बंडखोर्‍या या पक्षाच्या हातात राहत नाहीत, त्याला काही इलाज नसतो,’ असे सूचक विधान केले. त्यामुळे सांगलीत काँग्रेसचा नेमका विचार काय आहे, असा प्रश्न विशेषतः ठाकरे गटाला सतावू लागला आहे. काँग्रेसच्या अंतर्गत गोटात डोकावता, आगामी विधानसभा निवडणुकीच्या पार्श्वभूमीवर विशाल पाटील किंवा ठाकरे गट, दोघांपैकी एकालाही दुखावून चालणार नाही, या भावनेपर्यंत काँग्रेस आमदार विश्वजित कदम आणि विक्रमसिंह सावंत पोहोचले आहेत. त्यामुळे आमदारकी राखण्यासाठी ते ’तू धरल्यासारखे कर, मी मारल्यासारखे करतो’ ही नीती अवलंबतील, तर वसंतदादा पाटील यांच्या नातवावर कारवाई केल्यास, सांगलीतील जनाधार गमावण्याच्या भीतीने काँग्रेस विशाल पाटील यांच्यावर कारवाई करणार नाही, असे संकेत मिळत आहेत. परिणामी, लोकसभेच्या प्रचारात काँग्रेसचे सर्व नेते चंद्रहार पाटलांच्या व्यासपीठावर दिसतील, पण प्रचार विशाल पाटलांचा करतील, अशी चिन्हे दिसून लागली आहेत.