वसंत मोरे पुण्यातून वंचितचे उमेदवार, बारामतीत सुप्रिया सुळे यांना पाठिंबा!

 

वंचित बहुजन आघाडीच्या राज्य कार्यकारणीने राष्ट्रवादी काँग्रेस पार्टीच्या (शरदचंद्र पवार) उमेदवाराला बारामतीमधून पाठिंबा देण्याचा निर्णय घेतला आहे. तर, नांदेड अविनाश भोसीकर, परभणी बाबासाहेब उगाळे, छत्रपती संभाजीनगर अफसर खान, पुणे वसंत मोरे आणि शिरूरमधून मंगलदास बागुल यांना उमेदवारी जाहीर करण्यात आली आहे.

लोकसभा निवडणुकीच्या कालावधीत अंदाज (ओपिनियन पोल तसेच एक्झिट पोल) दर्शविण्यावर निवडणूक आयोगाने प्रतिबंध केला आहे. महाराष्ट्रात एकूण पाच टप्प्यांमध्ये निवडणुका होणार असून, दि. १६ मार्चपासून आदर्श आचारसंहिता लागू झाली आहे. राज्यात १९ एप्रिल रोजी सकाळी सात वाजेपासून १ जून २०२४ रोजी सायंकाळी ६.३० वाजेपर्यंतच्या कालावधीत एक्झिट पोलवर प्रतिबंध लागू राहणार आहे.

त्याचप्रमाणे प्रत्येक टप्प्यातील मतदान संपण्याच्या आधी ४८ तासांच्या कालावधीत ओपिनियन पोल अथवा अन्य मतदान सर्वेक्षणाच्या परिणामांच्या प्रकाशन अथवा प्रसारणावर प्रतिबंध असेल, असे निवडणूक आयोगाने अधिसूचनेद्वारे स्पष्ट केले आहे.