लोकसभेच्या रणांगणात नव्या रणनितीकारांचे पर्व

नवी दिल्ली : (पार्थ कपोले)यंदाची लोकसभा निवडणूक ही सर्वच अर्थांनी परिवर्तनाची ठरत आहे. भाजप आणि काँग्रेससह जवळपास सर्वच पक्षांची रणनिती आखण्याची जबाबदारी नव्या नेत्यांकडे आहे. त्यामुळे निवडणुकीतील यशापयश या नेत्यांच्या राजकीय भवितव्यासाठी महत्त्वाचे ठरणार आहे.

भाजपमध्ये अटल – अडवाणी पर्वापासून कार्यरत अरुण जेटली आणि प्रखर वक्त्या सुषमा स्वराज यांचे निधन झाले आहे. काँग्रेसमध्येही दीर्घकाळपर्यंत रणनितीचा प्रमुख चेहरा असलेले अहमद पटेल हयात नाहीत, ए. के. अँटनी दूर आहेत तर गुलामनबी आझाद यांनी स्वतंत्र पक्षच स्थापन केला आहे. सपाचे मुलायमसिंह यादव, रालोदचे अजित सिंह यांचेही निधन झाले आहे. मौसम वैज्ञानिक म्हणून ओळखले जाणारे रामविलास पासवानही हयात नाहीत. तर जदयुची रणनिती आता आरसीपी सिंह नव्हे तर के. सी. त्यागी बघतात. राजदचे लालू यादव सल्लागाराच्या भूमिकेत आहेत, तर तृणमूल काँग्रेसमध्येही ममतांची भिस्त पुतणे अभिषेक बॅनर्जी यांच्यावर आहे. ओडिशामध्ये बिजदचे उत्तराधिकारी म्हणून व्ही. के. पांडीयन यांचा राज्याभिषेक नवीनबाबूंनी केला आहे.